Tirkîya di rewşêka xirabe de ya. Rojhelato mîyanên de rol û erkî newe ra vila benê. Badê êrîşê hewayî yê Emerîka yê verva Sûrîya, min nûşteya xo bi serikê “Perdeyê Hîrine “ nûştebî. Di perdeyê hîrine de çîyê balkêşî qewemîyenê. Hêdî hêdî mij û dûman vila benê û plana esasî bi temaşekeran deyena hesîyayiş. Îtîya ra dime do kam, bi çi awayî û çendêke sehne de ca bigero, yeno zelalkerdiş.
Dim êrîşî ra, Emerîka û Rûsya roniştîy û di çarçoveya alozîya Sûrîya de, ray û raybazanê nexşerayira Rojhelatê Mîyanênî sero pê kerd. Nika, kerra û kuçikê ser rayire yenê pakkerdiş. Nê kerreyanê rayire ra yew zî Tirkîya ya.
Di destpêka lejê Sûrîya de rolo tewir aktîf deyabi Tirkîya. Nameyê Tirkîya sero Erdogan, bi eşq û kelecanêko pîl, ro rolê xo wayir vecîya. Bi xeyalê serektîya Rojhelatê Mîyanênî û xelîfetîya se serra 21’ine, dest bi karê xo kerd. Seba vistişê Esedî û bikarardişê verva kurdan, bi hetkar û ortaxo tewir eşkera yê çeteyanê DAÎŞ’î. Maseyê muzakereyan yê bi kurdan dir, qelebna. Verva Şarê Kurdî dest bi şerrê topyekûnî kerd. Seba ke hovîtîya ey rê bêvng bimano, Ewrûpa bi şirawitişê mihaciran tehdît kerde. Çimsûrîya Erdoganî resa astêka winayine ke teyareyê Rûsya ard war yan zî pê deya warardiş.
Bi naye zî Erdogan kewt verara Pûtînî. Bi kiştişê sersefîrê Rûsya, deynê Erdoganî diqat bi. Erdoganî bedêlê ney deynî de çeteyê xo rotî û Heleb teslîmê Esedî kerd. Bi pêvînayişanê Astanê hetê Pûtînî ra ame mecbûrkerdiş ke îqtîdarê Esedî qebûl bikero.
La seba ke bêro bikarardiş, bi temamî teberê kaye de nîyame verdayiş. Dekewtişê Bab û Cereblûsî rê çimî amey girotiş. Bi sebebê nêrazîbîyişê verva hemkarîya Emerîka û hêza kurdan, bi dostê Rûsya. Bi êrîşê Emerîka yê Sûrîya dir, Trumpî rê çepikî pero day û reyna vat gere Esed şêro. Ke Rûsya çimê xo tarî kerdî, vatişê xo apey girot. Zê goga fûtbolî maber Emerîka û Rûsya de şino yeno.
Badê referandûmê sosretî yê 16’ê Nîsane, ke ver çimanê heme dinya de pêk ame, Erdoganî rê herdîşêke/serkewtinêke lazime bî. Êrîşê verva Şengale û Rojavayî rê çimêxogirotişê Emerîka û Rûsya qasê ke zî na herdîşe û mesajdayişê kurdan bi.
Verva nê çimgirotişî, gere Tirkîya tay bedêlî bidêne. Rûsya bi peymana Astana ke bi Erdoganî da îmzekerdiş no bedêl girot. Do bi na peymane Esad qasênê zî hêzdar bibo û xo bikesys bikero. Tirkîya mecbûra çeteyêke mendê zî biroşo. Ya nê do Tirkîya zî înan di bêro mehkûmkerdiş. Pûtin ro çîyêkê winayinî geyreno. Na rewşe Tirkîya zî kena bin rîskî. La Erdogan di rewşêka wina bêkeyese de yo ke, zê pokervanê ke heme perey vînî kerdê û bi omûdê na rey do qezaenc bikera, heme çîy rê vano ez est a.
Bedêlê ke do Emerîka zî biwazo est bê. Her kes pawoka pêvînayişê Trump û Erdoganî yo. Di nê pêvînayiş de Trump do çi biwazo, bi temamî kifş nêbo zî zaf tay yeno texmînkerdiş. Şansê Erdoganî yo ke waştekanê Emrîka qebûl nêkero, çînyo.
Kurdî di Rojhelato mîyanên de resayê astêka winayine ke, êdî tu hêzêke nêşikena bê têkilîya bi kurdan dir, hesaban bikero. Na rewşe seba Emerîka zî Rûsya zî wina ya.
Bi goreyê texmîn û nîşaneyanê heta nikayî, do Trump vaco Rojavayî û rewşa Kurdan qebûl bike, ez kurdan dir şina Reqa. Di na rewşe de Erdogan mecbûro bi kurdan dir têkilîye rono. Heke na pêk bêro do bandora xo Vakûr de zî nîşan bido. Seba ke têkilîyê mîyannetewîyan de exlaq, wijdan û erjî çîn yê, verapeyê naye zî mumkun o.
Senî beno wa bibo, menga Gulane ra dime do seba kurdan, Tirkîya û bi pêroyî Rojhelatê Mîyanênî, perdeyê hîrine bi germê aminanî dir vêşêrî germin bibo. Beno ke verva na aktorbîyişê Şarê Kurdî zî bedêlêke bêro tayinkerdiş, gere kurdî heme rewşan rê hedre bê. Rewşe rihete nîya, şerrê barrekerdişî yê hîrine yê dinya yo.