HAYRÎ DEMÎR / MA / ANQARA
16ê teşrîna verêne de HSDyî bajarê Reqqa ke sey paytextê çeteyanê DAIŞî ameyêne zanayîş, çeteyan ra pak kerdbî û derbêka girde daybî çeteyanê DAIŞî ro. Çend rojî verê dezgehê fikrî yê Soufan Centerî ke merkezê ci Amerîka de yo, îdîa kerdbî ke endamê DAIŞî agêrenî welatanê xo û nînan ra 900 çeteyî zî agêrayî Tirkîya û bitaybetî zî bajarê Dîlokî de bica bîyî.
Babete ser o Parlamenterê HDPyî Mahmut Togrulî qisey kerd û vînayîşê xo ard ziwan. Togrulî dîyar kerd ke tena bajarê Dîlokî nê, heme Tirkîya de îxtîmalê hêrişkerdişê çeteyan esto, labelê hukmat vera DAIŞî de bi hawayî cîddî têkoşîn nêdano û tedbîran nêgêno.
Hûmare hîna zêde ya
Togrulî qiseykerdişê xo de ard ziwan ke hûmara ke dezgehê fikrî aşkere kerdo tena hûmara îdarekaran a û wina dewam kerd: “Seke yeno zanayîş, ma destpêk ra nata tim vatênê ke Dîlok de rêxistinîyêka girde ya DAIŞî esta. Eke endamêkê DAIŞî bi hawayo rehet yeno Tirkîya û derbazê welatanê bînan beno, o wext dêmek lojîstîk û rêxistinîya çeteyan Tirkîya de zaf hîra ya.” Wexto ke teng benî hêriş kenî
Togrulî dewamê qiseykerdişê xo de wina va: “Xeylê belgeyî nîşan danî ke çeteyê DAIŞî ser Kîlîs û Berê Sînorî yê Karkamişî ra derbaz benî. Tirkîya ser sînor de tedbîran nêgêna. Verê cû çeteyan seba Dîlokî vatbî Reqqa çi bo, Dîloq zî o yo. Rewşê winasî de eke çeteyî teng bibî, do hêrişê heme cayan bikerî. Xora nuqtaya ortaxe ya çalakîyanê bajarê Amed, Pirsûs û Anqara Dîlok a. Hema vaje heme çalakîyan de hêrişkar yan zî yê ke çalakîye organîze kerdî, rayîrê înan bajarê Dîlokî ra derbaz bîyo. Reyna hêrişo ke vera veyveyêk de bîbî zî Dîlok de bî. Wezîrîya Karê Zereyî va nê rojan de 160 çeteyî ameyî tepiştiş, labelê goreyê mi yê ke ameyî tepiştiş, yê ke şer kerdî nîyî. Ewro siba beno ke çeteyî bi hêrişî tayê cayan bikerî. Ganî hukmat têdbîran bigîro.”