No 3 hewte yo ke seba weşî, ewleyî û azadîya Rayberê Şarê Kurdî Kurdistan, Tirkîya, Ewropa û heme dinya de çalakîyî yenî viraştiş.  Nê çalakîyan ra yewe zî ya Dayîkê Aştîye ya. Dayîkê Aştîye Stenbol, Amed, Êlih û Wan de seba 3 rojan grevê vêşanîye dayî destpêkerdiş.  

Meclîsê Dayîkê Aştîye yê Stenbolî awanîya Unkapani de çalakîye dayî destpêkerdiş. Dayîkan salone de pankarta ke ser o ‘Ma do seba weşî, ewleyî û azadîya Birêz Ocalanî nêvinderî’ leqnayî. Dayîkan dolbentê xo yê sipîyan sereyê xo ra girêdayî û qisey kerdî. Dayîkan ra Ezîne Dale va ‘tecrîd ewro dest pênêkerdo, 18 serrî yo ke dewam keno’ û wina dewam kerde: “Ocalan îradeya şarî yo. No tecrîd tena Rayberîye ser de nê, heme kurdan ser o yeno meşnayîş. Heta ke Rayberîye azade nêbo, ti kes azade nêbeno.”


Tecrîdî reyde nêresenî cayêk

Meclîsê Dayîkê Aştîye Amed de zî dest bi grevî kerdî. Dayîkan ra Nafîye Yîgîte îzehetêk daye û wina va: “Ma dayîk î, canê ma dejeno. Ma nêwazenî ke zîndanan ra cenazeyî bivejyî. Ma wazenî hukmat û Wezîrê Edaletî no het de bi hawayo lez gaman bierzî. Tecrîd û gonîye reyde nêresenî cayêk. Ma do vera tecrîdî de têkoşînê xo bidomnî.” 

 Heto bîn ra heyeto ke tede Hemserekê DBPyî yê Amedî Mehmet Arslan zî esto, dayîkan zîyaret kerd. Tîya de Arslanî bale ant etirîyayîşê kurd û dostê kurdan ser û wina va: “Hukmat ewro tecrîdo lêmin domneno û no het de israr keno. Çalakîya grevê vêşanî ya dayîkan, seba hukmatî hişyarkerdişêk o. Seba ma manaya tecrîdî domnayîşê şer û pêrodayîşî yo.” 

Dayîkê Aştîye Êlih de zî kewtî grevê vêşanîye. Dayîkan veng da hukmatî ke wa Ocalan keye, avûkat û heyetî reyde pêvînayîşan bikero. Heto bîn ra dayîkan dîyar kerd ke ganî CPT bi hawayo lez Ocalanî reyde pêvînayîş bikero. Heto bîn ra îdarekarê HDPyî yê Êlihî zî do bi hawayo komkî waştişname bidî Serdozgerîya Komare ya Bursa, CPT û Wezîrîya Edaletî. 


Ma do tecrîdî bişiknî 

Dayîkê Aştîye bajarê Wanî de zî dest bi grevê vêşanî kerdî. Grev awanîya DBPyî ya bajarî de dîya destpêkerdiş. Salone de pankarta ‘Do tecrîd vînî bikero, azadî qezenç bikera’ ameye leqnayîş. Parlamenterê HDPyî Nadîr Yildirimî û xeylê kesî bînî piştî dayî çalakgeran. Dayîkan ra Kewê Işike va ‘Ocalan 18 serrî yo ke bi hawayo neheqî Zîndanê Îmrali de yo’ û wina domnaye: “Ma Dayîkê Aştîye her ca de grev da destpêkerdiş. Dewlete herinda ke îzehetêk bida, bêveng manena. Ma do tecrîdî bişiknî. Wa berê Îmrali bi hawayo lez bêrî akerdiş.”

Îzehet ra dima grev bi çepik û tilîlîyan dest pêkerd.