Seba viraştişê Kongreya yewîya neteweyî vengdayîşî ramenê. Pêşmergeyê Colemêrgî yê ke serranê verên de Herêma Kurdistana Başûr de şer kerdîbî zî veng day pêrokîn rêxistin, partî û çormeyanê kurd ke seba yewîya neteweyî zewîfe bigîrê û rolê xo kay bikerê. 

Pêşmergeyanê verî ra Mehmet Turan o ke serranê 90’î de rîwalê kerdenanê dewlet koçê Colemêrgê kerdîye, ard ziwan ke eyî serra 1972 ra heta 1977’î zey pêşmerge Başûrê Kurdistan de bîyo. Turanî veng da Barzanî ke ê rojan xo vîra nêkero û gamanê verarde kerdişê 3 leteyanê bîn yê welatî bierzo.

Wa gonîya ma endî nêrijîyo

Pêşmergeyê verî Turanî vist vîrî ke lingeke Birêz Barzanî erdî de ya, lingeka bîn zî hewa de menda û wina va: “Eke seba Barzanî seba yewîya neteweyî hewl bido, do kurdê bînî zî ci het de ca bigîrê. Tîya ra veng dana pêro rayveranê kurdan ke bibê yewe. Heta nika ma zaf dej û janî antî. Gonîya wa û birayanê ma rijîya. Ganî hinî ma bibê yewe ke gonîya ma nêrijîyo.” Turanî tewr peynî de aşkere kerd ke tek çare yewî ya. 

‘Firsendekî gird esto’ 

Welatijan ra Halît Aktaş o ke fermandarîya pêşmergeyan kerdbi û xeylê merdimê xo vinîkerdbi zî dîyar kerd ke ganî ewilîya tewr muhîm yê kurdan yewîya neteweyî bo. Aktaşî hayr ant şer, koç û zehmetîyanê serranê 70î yê Iraqî ser û wina va: “Ma ewro zî wazenê ke kurdî bibê yewe. Ma gencanîya xo de çîyo ke kewt ser doşê ma, ma kerd. Ganî her kes menfeatanê şexsî ra dûr bikewo û seba yewîya neteweyî hereket bikero.”

‘Roj roja yewîya’

Pêşmergeyanê verên ra Ahmet Severadli zî hayr ant tekoşîna înan ya hemverê zilmê Seddamî ser û wina va: “Ganî tekoşîna ê rojan hetê tayî kesan nîro vîrî kerdiş. Eke ewro tayî kesî bi rehatî nefes gênê se, bi saya têkoşîna ê rojan a. Ê rojan de ma bî yewe û ma serkewtî. Ganî ewro yewîye hona vêşêr gird bibo. Eke ma bibîyayba yewe, dewlet do nêşkîyaba serokanê ma bigirotiba.”

Severadli vist vîrî ke vernîya kurdan de firsendekê gird esto û va, roja ke kurdî bibê yewe dê serbikewê. Pêşmergeyê verên Severadli pêrokîn rayveranê 4 leteyanê Kurdistanî ra rîca kerd ke bîrê pêhet û bibê yewe û va, ‘roj roja yewîya.  


COLEMÊRG