Vizêr nê perey Hemserokê Meclîsê Şarî yê Cizîra Botan Mehmet Tunç tewrê Sterk TV bi û hina qisey kerd. “Nika Cizîra Botan de herb-şerêk zaf giran esto. Ez nika qisey kena. Beno ke nê qiseyê min ê peynî bê. Ma pêro kewtî meterîsan û bajaranê xo pawenê. Dewleta Tirk pê-bi tanq û topan hêrîşe mehla û kuçeyan kena. Hetanê guleyê xo yê peynî ma xoverdayîş kenî. La, wa her kes bizano, kewtişê Cizîra Botan kewtişê pêrokîn Kurdistan o. Cizîra Botan hina muhîm a. Gerek şarê ma bêveng nîmano. Hele şarê ma yê ke Awrûpa de ciwîyeno ganî qet bêveng nîmano.” Hemseroka Meclîsê Şarî yê Silopî zî hina qisey kerd.
Nê qiseykerdişan de vejîyeno werte ke, çimê şarê ma ser Awrûpa de yê. Hetanê nika Awrûpa de bena tayî çalakî bîye. La belê bes nîye. Awrûpa de, eke çalakiyê zaf xurtî seba Amed, Cizîra Botan, Silopî, Nisêbîn, Kerboran, Derîk, Farqîn viraziyê rewş tayî ciya bena. Şarê ma yê Kurdîstan’î na raştî vîneno, şarê ma yê Awrûpa ra omid-hevî keno û hina vendeno. Gerek şarê ma yo ke Awrûpa de ciwîyeno na raştî bivîno, gore na raştî zî wayirê xoverdayîşê Bakurê Kurdîstan’î bivejîyo û pê çalakîyanê xo pêronê dinya haydar bikero.
Verra şerê Kurdîstan’î hêrişê komkiştiş û qirkerdişê esto. Xora belge ser belge vejîyenî werte. Yew belge bi nameye “Çokertme”, yew “Belgeyê Şerê Teybet yê Medya”, yew zî “Belgeyê Kiştişe” vejîya werte. Gore nê hîrê belgeyan, dewleta tirk wextê Şêx Seîd û Seyîd Riza de sekerdo, wazena eynî çî nika zî bikero. Xora hina zî kena. Wexto ke dewleta tirk planê hina virazo û gore nê planan hêrîşê Kurdîstan û bajaranê Kurdîstan bikero, şarê Kird zî bêveng vindero, do qirkerdiş bibo. Seba ke vernîye qirkerdiş bîyero girewtiş gera şarê ma Awrûpa werzo ser lingon û role xo kaybikero.
Sey deyîrbazê kird yê Çewligijî Zaza Amed vano gera şarê Kird(Kurd) hina biqerar bo. Zaza Amed deyîra xo “Dinya Dinya lê Dinya” de ina vano:
Dinya dinya lê dinya
Ti xayîna lê dinya
Ti kirdan xapînawa
Ti merdan xapînawa.
Ti ca kirdan nîdawa
Welat kirdan nîdawa
Ti erd kirdan nîdawa
Ti Kurdîstan nîdawa
Welat ma kerd 4 parçe
Ziwan ma kerd felqe felqe
Heya azadîya gel
Heya azadîya gel
Ma welat xo vera nîdanî
Hevalê xo bernîdanê
Ma Kurdîstan bernîdanê
Serokatî bernîdanê”
Zey Zaza Amed deyîra xo de vato, gera şarê ma yê Kurdîstan û Awrûpa ciwîyeno hetanê Kurdistan û serok azad bibo, xoverdayiş bikero.