MÛRADA KENDA/RAPÊRÎN TEHLO / ANHA/QAMIŞLO
Vervatoxê PYDyî Salih Muslîmî derheqê kerdişanê dewleta tirkî yê Efrînî de qisey kerdî û zanayîşê muhîmî pare kerdî. Muslîmî qala dêsronayîşê dewleta tirkî yê sînoranê Efrînî ser o kerd û da zanayene ke no seba ke agêrayîşê şarî asteng bikero ameyo kerdene.
Muslîmî va ‘dês parçeyêkê îşxalî yo’ û wina domna: “Dewleta tirk plananê xo yê lêminan domnena. O planan ra yew zî ronayîşê dêsî yo. Cîyakerdişê Efrînî teberê huqûqê mîyanneteweyî yo. Heqê dewletanê îşxalkeran zî çin o ke wina bikerî. Dewleta tirk bi no qeyde hewl dano reyna biagêro wextê Osmanîyan. Cok ra hedefê ci tena Efrîn nê, heme Vakur û Rojhelatê Sûrîye yo.”
Muslîmî da zanayene ke kerdişanê dewleta tirkî ver, ti dewlete vengê xo nêkeno û wina va: “Na bêvengîye netîceyê menfîetan de vejîyaya. Rûsya û Îran tavîzan danî Tirkîya. Hedefê înan o yo ke Tirkîya biancî hetê xo. Wa şikê ti kesî çinêbo ke sucê ke vera kurd û şaranê bînan ê Sûrîye de benî de nînî efûkerdene. Polîtîkayanê dewleta tirkî ver rejîmê Sûrîye zî bêveng maneno û no zî merdim de tay şikan virazeno.”
Muslîmî va ‘dewleta tirk waş warê ke bin hakîmîyeta ci de yî de tayê bedilnayîşan bikero, labelê sernêkewt’ û wina va: “Nika hewl dano heme çîyan Efrîn de bikero. Tirkîya zana ke şarê Efrînî do tepîya biagêro. Cok ra lez dayo ronayîşê dêsan. Labelê wa baş bizano ke se beno wa bibo, şarê Efrînî do tepîya biagêro. Nika seba agêrayîşî amadekarîyî estî. Dewleta tirkî wazena vernîya ci bigîro.”