Rojnameger Îbrahîm Aslanî nuşteyê xo yê keyepelê Gazete Karinca de bi 3 fotografan analîzê dewlete kerdo. Rojnameger Aslanî dîyar kerdo ke eke şima ci ra pers bikerê mîyanê hewteyê peyênî de bi fotografan qala Komara Tirkîya bikere, o do şima rê 3 fotografan nîşan bido.
Aslanî sey fotografo yewin, fotografo ke bi wesîleya 19ê Gulane Samsûn de temsîlkarê partîyanê sîyasîyan antbî, nîşan da û wina va: “No fotograf de heme kesî camêrd î û no fotograf camêrdîya dewlete nîşan dano. Manaya îdeolojîke ya nê fotografî zî esto. Xora Erdoganî sey ‘Ruhê Samsûnî’ şinase kerdbi. Dewleta ke hetê Îngilistan, Fransa û Almanya ra amebî awankerdene, tekperestîye esas gêna û ameyîşê têhet yê nê temsîlkaran zî na tekperestîye nîşan dano.”
Aslanî nuşteyê xo de fotografê îşkenceyî yê Xelfetî zî sey fotografo dîyin girewto dest û wina vato: “No fotograf zî medyaya sosyale de ame parekerdene. Fotograf de aseno ke nizdîyê 70 kesê ke ciwanan ra heta extîyaran tede ca gênî, erd de ameyî dergkerdene û destê înan ameyo kelepçekerdene. Polîsî zî bi sîlehanê xo sereyê înan ser o gêrenî. Ti ferqê nê fotografî, Qirkerdişanê Şêx Seîd, Dêrsim, Gurgum, Gazî û sewbîna çin o. No fotograf eynî wextî de halê kurdan dano nîşandayene.”
Fotografo hîrêyin de merg esto
Aslanî qala ciwano ke Dîlok de xo veşnabi zî kerd û wina va: “Fotografo hîrêyin qezaya Şahînbeyî ya Dîlokî de vejîya orte. Bi nameyê Eyup Dalî de ciwanêk bêkarîye ver xo veşna û 4 rojî ra dima wefat kerd. Kesê ke Samsûn de ‘ruhê dewlete’ temsîl kerdêne, çiqas erj danî kesanê ke pê keda xo cuyenê, ame famkerdene.
AMED