BÊRÎTAN SARYA/ANF/DÊRAZOR
Şorişê Rojawanî ke nizdîyê 5 serran o bêmaben dewam keno, şahidîya bi hezaran şexsîyetanê qehremanan kerdo. Nê şexsîyetan ra yewe zî Alî Serêkanîyê yo. Alî Serêkanîyê nika Dêrazor de cepheyê şerî de ca gêno.
Serêkanîyê 25 serreyî yo û seba ke Hemleya Azadkerdişê Reqqa de birîndar bîyo, linga ci de qalib esto û bi gopalan hereket keno. Serêkanîyê Qamişlo de tedawî vîneno. Labelê o reyna zî embazanê xo reyde têkoşîn dano. Babete ser o Serêkanîyêyî qisey kerd.
Serêkanîye dîyar keno ke wexto ke merdim reyêk toz, herre, tîje, çamir û varanê tîya bivîno, merdim nêşêno tira biqerfîyo û wina dewam kerd: “Merdim tîya de embazîye museno. Yê ke nêdîyo nêşênî ma fam bikerî, labelê yê ke dîyî ma baş fam kenî. Ez Reqqa de birîndar bîya, herçiqas ke embazan waşt ez tedawîya xo bidomna, labelê ez nêşêna dure bivindera. Cok ra ez wazena hertim cephe de biba. Ma bi serran o ke mîyanê şerî de yî. Seba mergî nê, seba cuye ma şer kenî. Helbet ma do cuye ra zewq zî bigîrî û ê rindêr bikerî.”
Ma Reqqa de zehmetîye nêant
Serêkanîyê mîyanê hêzo sifteyîn yê pawitişî YXK de zî ca girewto. Wexto ke taburê sifteyînî awan bîyî, ewja de zî ca girewto. Hemleya Serêkanîye ra dima şîyo Heleb û ewja de xover dayo. Serêkanîyêyî va ‘ez şerê Reqqa de qet nêkewta zehmetîye mîyan’ û wina domnaye: “Heleb de şert û mercê ma hîna zehmetin bî. Ma ti hêzê mîyanneteweyî ra hetkarîye nêgirêwtêne. Ma şert û mercanê zehmetîyan de şerkerdişî musayî. Cok ra embazê ma Reqqa de nêkewtî zehmetîye.”