DÎNDAR KARATAŞ / MA / WAN
Badê ke qayûmî tayînê şaredarîyanê Amed, Wan û Mêrdîn bîyî, 20 rojî yo ke vera qayûm û xespê îradeyan de çalakîyî dewam kenî. Nê çalakîyan ra yewe zî Nobeta Demokrasî ke Wan de yena tepiştene ya.
Xeylê kesî beşdarê çalakîyan benî û çalakgêran ra yew zî Hemserekê qezaya Şaxî yê HDPyî Tayîp Balkan o. Balkan eynî wext de dengbêj o zî. Balkan çalakîya nobete de hem kilaman vano û hem zî sewbîna deyîran reyde moral dano şarî. Balkan wextê çalakîye de kilama ‘Elo Dîno’ vano û dîyar keno ke hîkayeya aye kilame manenî çîyê ke ewro yenî cuyayene.”
Balkanî va ‘ganî ma vera qayûman de têkoşînê xo hîna zêdeyêr bikerî’ û wina dewam kerd: “Kurdî ewro xeylê neheqîyan de têrî manenî. Heqê şarî destê ci ra yeno girewtene. Coka destê kamî ra çi yeno, ganî bikero. Ez roja sifteyîne ra nata tîya de ya. Ez bi vatişê kilaman zî moral dana embazan. Hezar serrî yo ke Kurdî bi dengbêjî derd, problem, dej, zulm û qehremanîyan vanî. Bi no hewa çîyê ke benî yenî vatene û neqlê neslanê ameyoxan benî. Ez zî seba ke çîyê ke benî neqlê ameyoxî bibî, kilaman vana. Ganî ma nê zulmî domananê xo ra vajî. Wa herkes destek bido çalakîyan.”