Hemserekê Meclîsê Şarî yê Cizîrî Mehmet Tunç qasê 79 rojan xoverdayîşê qezaya Cizîrî ya Şirnex de ca girewtbî û hêrişê dewleta tirkî ver sere nêronabî. Mehmet Tunç vera hêrişê tanq û topan de bi vatişê ‘ma do sere nêronî’ bîbî sembolê xoverdayîşî.Babete ser o keyeyê Mehmet Tunçî qisey kerdî.
Ma 246 rojan hesretê yew mezelî bî
Qeza de nameyê Mehmet Tunçî tim ziwanê şarî de yo û şar hîna zêde yewbînan rê wayîr vejîyeno. Keyeyê Tunçî de heyatê Tunçî sey hîkayeyêk yeno vatiş. Dayîka Mehmetî Esmer Tunçe ke di lajê xo vînî kerdî, bi hawayo heybetin vindena. Dima ra fotografê Mehmet û birayê ci yê Orhanî yeno ode. Dayîke fotografî gêna xo dest û ronena ser zerrîya xo, hesirî pêsero pêsero çimanê aye ra yenî war. Dima ra dayîke Esmer Tunçe vana ‘cenazeyê domananê mi Şirnex de ameyî definkerdiş’ û qiseykerdişê xo wina domnena: “Ma seba ke bajar de qedexe estbî, 246 rojan hesretê mezelî bî. Ma her panşeme şonî goristan. Ma wazenî ke serrgêra lajanê xo de mezelê înan bîyarî tîya. Wa mezelê înan tîya de bibî ke ma her hewte bişînbî biveynî û hesretê xo pê biviyarnî.”
Mehmet bi leteyekê tarîxê Kurdistanî
Cinîya Mehmet Tunçî, Zeynep Tunçe qisey kerde û wina va: “Yew dakîka daxî verê çimê ma ra nêşono. Ma her çiqas ke hende çîyî cuyayî, reyna zî saya înan de hende qewetin vindenî. Di merdimî keyeyê ma ra şîyî. Mehmet êdî bî parçeyê tarîxê Kurdistanî. O bî sembolê xoverdayîşî. Mehmet çi sere rona û çi zî teslîm bî; heta peynî xover da. Wexto ke mi Mehmetî ra va bivejyî, labelê o mi ra va ‘qet qala çîyêko winasî daxî meke.’ Mehmet her tim mi ra vatêne ‘înşalah ez do cila xo mîyan de nêmira, mîyanê têkoşînî de bimira.’ Demo verêne de tayînan guleyî erebeya ci ser o reşanaybî û o wext Mehmetî vatbî ‘Ez mergî rê amade ya.’
Ma do têkoşînê înan bidomnî
Zeynep Tunçe dewamê qiseykerdişê xo de hayr ant hêrişanê dewlet ser û va ‘Mehmet û Orhanî ra dima zî dewlete destê xo ma ra veranêdaye’ û qiseykerdişê xo wina domnaye: “Ma ra vanî ‘ma do keyeyê şima birijnî’. Ge-ge zî yenî û vanî ‘Mehmet kura de yo?’ Keyeyê ma zî sey Mehmetî veşnayî. Nika zî wazenî birijnî; ez 7 domananê xo reyde şêra kura? Ma do têkoşînê înan bidomnî.”
Reyna zî fek têkoşînî ra vera nêda
Waya Mehmet Tunçî Fatma Tunçe zî va ‘her çiqas ke cinîya Mehmetî vatbî ‘eke Mehmet fek xoverdayîşî ra veranêdo, ez do keye biterikna û şêra’ zî Mehmetî fek xoverdayîşê xo ra vera nêda û qiseykerdişê xo wina qedênaye: “Eke Mehmet teslîm bibîyêne, o wext do Cizîr zî binkewtêne. Mehmet şewe yeno hewnanê mi û mi ra vano ‘ez nêmerda’.”
D.MUFTUOGLU / Z.FENDÎK / DÎHABER/ŞIRNEX