Hemserokê HDP Selahattîn Demîrtaş şewa verên Çewlig de tewrê werdişê fitarî ke hetê rêxistinanê HDP û DBP bi. Demîrtaşî vist vîrî ke mesûlê gonîrijnayene AKP yo û aşkere kerd ke dûştê zilmo ke kurdan rê rewa yeno vînayene dê bi mîrasê Şêx Seîdî xover bidê. Hemserokê HDP da zonayene ke wexto ke kes xover dano şensê ci yê serkewtişî zî vêşêr o, la wexto ke çokî rono û teslîm bibo o şans zî nêmaneno.
Werdişê fitarî ke bi seyan welatijî beşdar bî bi wendişê mewlîdî destpa kerd. Badê akerdişê fitarî Hemserokê HDP Selahattîn Demîrtaşî derheqê rojdemî de qisey kerd. Demîrtaşî vist vîrî ke fitarê înan yê Çewligî raştê 91. serragêra îdamkerdişê Şêx Seîd Efendî û embazanê ci ame.
Mîrasekê erjaye ternay
Selahattîn Demîrtaşî da zonayene ke verîya 91 serran wexto ke berdî sehpayê îdamî Şêx Seîd Efendî zanabi ke o sekeno, mîrasekê seyî veradano û vatişanê xo hina domna: “Înan tornanê xo rê mîras verada, bawerîyê ma kerdî. Înan sereyê xo çewt nêkerdî, ef nêwaştî, çike çîyekê şaş nêkerdî. Zaliman zî zana ke mezlûman ra medet nîno pawitene. Şêxan zanayî ke wexto ke zilm ameyo ver kêberî sareberz vinderdiş ra zewbîn tercîx çinîyo. Belkî zaf quwetê înan çinêbi, belkî civak (şar) tam hazir nêbî. La înan fehm kerd ke qijanê (doman) xo rê mal, milk û perre ra vêşêr ternayişê mîrasekê erjaye û bi mane şert o.”
91 serrî vêrdî ra
Hemserokê HDP Selahattîn Demîrtaş’î ard zon ke Şêx Seîd û embazê ci bi na bawerî Meydanê Amedî de vera sehpayê îdamî rayşî û hayr ant mîraso ke înan pey xo de ternayî ser: “Înan fehm kerd ke o sehpayê îdamî de her çî nêqedîno, destpa keno. Ser ra 91 serrî vêrdî ra û fikrê înan, bawerîyê înan nêxelitya. Homa înan ra razî bo ke ma rê mîras û vindertişeke hinayî verdayî. Kesê ke wayîrê rûmetê şarî vejyenê o çaxî de zî estbî, nika zî estê. Kesê ke xîyanetê erjayeyanê şarê xo kenê o çaxî de zî no çaxî de zî estê. Her dewrê tarîxî hina yo. Yê ke semedê şarê xo pêrokîn çîyê xo kenê feda, û yê ke semedê menfeatekê qijkek her çîyê xo roşenê. Yê ke wayrê rûmet, heysîyet û şerefê xo danê xover tarîx nusnenê. Yê ke pey de manenê qetî nêşkenê tarîxî binûse. Çike ê serva malê qijkek yê dinya pêrokîn erjayeyan ra fek veradenê. La ma ewro semedê hurmet, aw û rîyê xoverderan îta de me.”
‘Tewr vêşêr cografyeya îslamî de gonî rijyena’
Demîrtaşî hayr ant maneya Aşma Remezanî ser û vist vîrî ke fermanê Homa na aşmî de ameyê rîerdî. Demîrtaşî da zonayene ke fermanê yewîn yê Homa wendiş o û hina va: “Semedê fehmkerdişê heqîqetan, tarîxî, naskerdişê xo, edaletî, têdûştî wendiş şert o. La çîyo ke tewr tayî (şênik) yeno kerden zî wendiş o. Rîwalo ke mesajê homayî nînê wendiş tewr vêşêr zî cografyeya îslamî de gonî rijyena. Helbet engişta emperyalîstan zî nê herban de esta, la wexto ke dirbeta to bibo kesê ke wirênenê zafî yê. Wexto ke ti xo bi xo rê nêbê melhem, nêşkenê sûcî çew (kesê) bîn de bigerê. Kesê ke nêşkenê meseleyanê xo çare bikerê, dirbetanê xo pansûman bikerê mudaxaleyanê teberî ra akerde manenê. Sebebê rewşî sefîl yê Tirkîye zî no yo. Nêşkena derdanê xo rê bibo derman.”
‘Jû hetî de DAIŞ, jû hetî de AKP’
Hemserokê HDP Demîrtaşî vist vîrî ke Tirkîye de şirik bi şirik gonî rijyena û aşkere kerd ke ser hikum de jû îxtîdar esta ke serva rijnayişê gonîya welatijanê xo û sexlem kerdişê cayê xo her çî kena. Demîrtaşî da zonayene ke bi rojano o dinyayî geyreno (fetelîno) û hayr ant dinya de îmajê Tirkîye ser: “Mi reyna ewilî dî ke dinyaya teberîn de Tirkîye bîyo welatekê tersî. Jû hetî de DAIŞ, jû hetî de AKP, çimê dinya de hurdî zî zeypê yê. Atmosferekê panîkî ronayê. Ameyî sûkanê ma de bombe teqînay, dinya çarnay gola gonîn, îmajekê hina esta. Nayî bi nameyê îslamîyetî kerdî. Partîya ke va ‘ez îslamîyet ana’ dinya de heta nika zerarê tewr gird da îslamîyetî. Merdimo ke pêrokîn gunayan kerd Quranî gêno destê xo û geyreno yo. Îslamî dûştê îslamî day şixûlnayene û dînekê newî ronayî. Qaîdeyan, fetwayan bi xo day. Dînekê çinyo, dînekê rîreş ronayî. Merhemet, pêkerdişê no dînî çinyo.”
‘Hewl danê şarî bixapînê’
Demîrtaşî hayr ant pêkerdişê AKP û Îsraîlî ser zî û va ‘yê ke heta vizêr bi vatişê ‘Îsraîl dewleta terorîya’ meydanan de rey are kerdî, ewro bi vatenanê ‘Îsraîl îtifaqê ma yo’ meydanan de xîtabê eynî kesan, hometan kenê. Hemserokê HDP vist vîrî ke ablûqeya Gazze nêdarîye we û hina dewam kerd: “Filîstînijî, Gazzeyijî hona zî ablûqe de yê. Kêştî (kelek) dê reyna dekewê benderê (lîman) Îsraîlî. Heto bîn ra ablûqeya zerya ramena. Vanê ef ame waşten la ma nêaşnawite. Nêşkenê vajê ma ‘çok da ro’, ‘barê herbo ke zerreyîn de ma ramit hinî nêşkeme hewadime’. Vanê ma pê (bi) Îsraîl û Rûsya pêkerd. Çapemenîya AKP zî bi vatenanê ‘Ma Îsraîl ard ray’ bi hewayê serkewtişî hewl dana şarî bixapîno.” Demîrtaşî hayr ant babeda pêkerdişê pê Rûsya ser û va ‘wexto ke ez şîya Rûsya mi zey ‘xayînê welatî’ îlan kerdî. La yê ke vizêr heqaretê ma kerdî, ewro eynî çî bi xo kerdî û zey serkewtiş damûsnenê.”
‘Keyeyan, sûkan veşnay’
Hemserokê HDP Selahattîn Demîrtaşî da zonayene ke teror û faşîzmê AKP yê sûkanê Kurdistan de rameno û hayr ant rijnayişê keyeyan û sûkan ser: “Bi behaneyê xendekan pêrokîn qezayan welişnay. Cizîr, Sîlopya, Sûr û Gever de operasyon qedîyayo, la rijnayiş rameno. Pêrokîn berê (kêber) keyeyan teqînayê û yew bi yew kewtê zerre û her çi kerdê texrîp. Kewtê odeyanê rakewtiş û heqaretî nusnayê. Semedo ke ters bivistrê zerrîya kurdan hina kenê. Nî bi fermanê Seray amey kerden. Bi top û dozeran rijnayî. Sûr de 8 aşmî vêrdî ra la hona zî rijnenê. Nisêbîn de, Şirnex de ramenê.”
Demîrtaşî qiseyê xo bi vîrardişê Orhan Dogan û Medenî Yildirimî qedîna.
Dûştê zilmî girdahîya xoverdayişî
Demîrtaşî qiseyanê xo de reyna hayr ant xoverdayişê Şêx Seîdî ser û hina va: ‘Heta ki girdahîya zilmî nîro vînitene, girdahîya xoverdayişî zî nîna vînayene. Şêx Seîd Efendî reyna wextekê hinayî de şi îdamî. Îman û îtiqatekê ci estbi. Eke a roj teslîmbibîyayba, vatiba ‘ez poşman’a do ma rê şerm biba. Dûştê zilmî de do xoverdayiş bibo, zewbîn kes nêşkeno xeysîyetê xo bixelesno. Wexto ke mordem xover bido şensê ci yê serkewtişî esto.
Cayê ke amey welişnayen û veşnayen rê ma dê wayîr bivejyê. Wazenê ma bitepişê, bikişê, ma dê sereberz vinderê. Ma înan ra heqdarî yê. Ma quwetê xo heqdarîya xo ra gênê. Qeleyê zilmî dê biwelişê. Her felaketî ardî sereyê ma, la ma nêqedîyayî û eksê nayî ma hona vêşêr bi quwet bî. Çike ma sereyê xo nimz nêkerd, ma xover da, ma fedekarey kerd. Çimê şaranê mezlûm ser ma de yo.”