Walî û Qeyimê Şaredarîya Girde ya Amedî Hasan Basrî Guzeloglu karmandê şaredarîye rê seba bedilnayişê sendîkaye mobbîng şuxilneno. Taybetî endamê TUM BEL-SENî rê vîyartişê Sendîkaya BEM-BÎR-SENî ra teda yeno kerdiş.
Babete ser o Hemserekê TUM BEL-SENî Bakî Ondeş dîyar kerd ke hedef mojnayişê walî ra pey endamê înan rê teda yeno kerdiş û wina vat: “Endamê ma rê vanî ke eke şima sendîkaya ra îstîfa nêkê, ma do şima îxraç bikê. Nika karmendan ra heqê înan ê nanî nîno dayiş. Seba nêdayişê heqê nanî ser o zî sendîkaya ma hedef nîşan danî.”
Ondeş aşkera kerd ke sendîkaya ma hetê îqtîdarê AKP û MHPî de terorîze yenî kerdiş, endamê înan rê mobbîng yeno şuxilnayiş û wina dewam kerd: “Ma do têkoşînê xo ra fek veranêdê. Nika seba ke DÎSKÎ de zafêr karmend BEM-BÎR-SENî ra vîyartê înan rê heqê nanî yeno dayiş.”
AMED