Badê xoverdayişê tarixî yê 134 rojan Kobanê serkewt. Hewldayen û hemleyê vistişê Kobanê yê çeteyanê barbar ke 15'ê Îlone de destpa kerd 26'ê Çile de veng-tol vejya. Nê kom û çormeyê terorîstan qûwetanê serdestan ra paşt girot û bi pêrokîn qûwetê xo yê eskerî hêrişê Kobanê kerdî. Çeteyan sond wendî ke Kobanê welişnê, serûbin bikerê, kokê ci biyarê. La nêzanay ke, na qorî verdê înan de kamî estê. Hesab nêkerdî ke verdê înan de şarê qedîm yê Mezopotamya Kurdî estê û wayirê îradeyê senîniyê? Şexs dê daiş de qûwetanê serdest waştî ke kobanê û sîstemê xoser yê rojawa bivistnê. Hesabê wina kerdî ke, e ke rojawa bivistnê, pêrokîn Kurdistan de sîstemê xoser û demokratîk yê Kurdan do veng-tol bivejyo. Şexs dê herbê Kobanê de hesab û planê zaf girdî û qilerînî amey kerdin. Herbo ke daiş da destcikerdin cewherê xo de hemleyê pûçkerdişê paradigmayê rayverê şarê Kurd Abdullah Öcalan'î yo. No herb şexs dê Kobanê herbê verra pêrokîn Kurdistan bi. Binkewtişê ci zî, serkewtişê ci zî do malê pêrokîn şarê Kurd bibiya.
Kurdê Kobanê, yê Rojawa û pêrokîn Kurdê azad sond wendî ke Kobanê do nêkewo û vatî ma dê heta çilkê peynî yê goniya xo, xoverbidê. Kobanê'yijan bi verniyîna YPJ û YPG de sozê xo ard ca. Bi bedelê giran, şexs dê Arînan de bi rihê fedaîyane yê ceniyanê Kurd, bi cesaretê gird yê Paramaz, Kader, Sibel û seyan kesanê bîn Kobanê serkewt. Fina-onca ispat bi ke ti artêş, tifing û qûwet nêşena verniya îradeyê şarî de vindero. Wa hezar finî şarê Kobanê rê silam bo ke verra dişmenanê xo vinderdişê do wina rumetîn damisnay. Wa mayanê Kobanê û rojawa yê zey Eyşê Efendiyan rê hezar finî silam bo ke keyney û lajekê wina bi cesaret û wayrê îrade ardiyê dinya û kerdê gird. Pêrokîn Kurdistan deyndarê Kobanê yo. Çi ke kobanê çareyê spî yê tarixê Kurdan o.
Nika zî qorê cayanê bîn o. Ganî pêrokîn Kurdî verikîn Şengal û her ca de komanê faşîst û dewletanê îşgalkerdoxan welatê xo ra biqewrnê. Piyakarê daiş sermiyanê dewleta tirk ke binkewtişê Kobanê pawenê nika werzenê Kobanê silamî kenê. Çi ke îrade û rihê xoverder yê Kurdan dî. Çi ke pêrokîn hesabê ciyê şaş Kobanê ra peyser ageyray. Endî şarê Kurd biyo aktörê esasî yê rojhelatêmiyanî. Nayî ra ters û xofê do girt kewto zerya rejîmanê zey tirkiye û îran.
Wext endî wextê Kurdan o. Serkewtişê Kobanê ra piya tenya rojhelatêmiyanî de nê, pêrokîn dinya de endî mîladê Kurdan destpa kerd. Yê ke verra Kurdan adir fiştnenê ci, dê bi xo o adirî de biveşyê. Yê ke verra Kurdan hesabê şaş bikerê aqûbetê înan do zey daiş bo. Helbet serva Kobanê û rojawa herçî nêqediya. Karê esasî nika destpa keno. Şarê Kurd yê rojawa ke verra barbar û faşîstan îmtihanê gird day, nika gune lez bidê înşakerdişê sîstemê xo yê xoser.
E ke şarê Kurd her ca de tekoşînê xo berz bikero serra 2015'î do bibo serra serkewtişê Kurdan. Kobanê ray û raybazê serkewtiş damisna. Endî gerek hiqûqê dewletanê faşîst ser welatê ma xo ferz nêkero. Xo ra meşrûîyetê tî dewletan nêmendo. Endî gerek şarê Kurd her ca de heqê xo yê netewî bigîrê û xosereya xo yê demokratîk îlan bikerê. Seweta-qandê serbestî hemleya peynî mend. Pêvacoyê do zehmet verniya ma de esto. La kesê ke zerya ci de Kobanê erzenê dê serkewê.