Êdî no ziwan roje bi roje verba standardîze şono û hona tayê kesî gorê kêyf û refê xo nusnenê. No ziwan bêwayîr nîyo, no ziwan bêkes nîyo û no ziwan baw û kalkanê ma ra, ma pêroyîne re mîras mendo û ma kî wazeme nê mîrasê baw û kalê xo bişeveknîme. La hênî aseno ke ma nê mîras re wayîr nêvecîme. Gere ma nê mîrasê baw û kalî biresnîme aj û amênê xo.
Kesên ke tezde dest bi nustîşê kirmanckî kerdo û wazenê bi kirmanckî binusnê gere etabo viren de alfabeya kirmanckî rind bimusê û goreyê alfabeya kirmanckî kî binusnê. Hênî bi rast geme nusnayene nêbeno. Mordem gere qedr û qimet bido ziwanê xo. Qedr û qimet kî bi raşt nusnayene, bi raşt wendene, bi raşt qese kerdene bena. No semed ra kî mordem ke nê husisan de dîqet bikero zaf rind beno. Ma zere û can ra ke wazeme ziwanê xo re wayîr vecîme, gere ma gorê alfabeya kirmanckî û goreyê standardê ziwanî binusnîme ke wa ziwanê ma rehet bero wendene, wa rehet bero nusnayene û wa êdî ziwanê ma standard bo ke ma Kirmancî kî jumînî rind fam bîkerîme.
Karê ziwan zanoxenî karê de ilmîyo
Ewro tayê kesî vecîye mîyan û xo ra "Ziwan zanox (Dil Bilimcisi)" vanê û temaşe temaşe herfan û alfabe vecenê mîyan. Yane her kesî goreyê xo herfî û alfabe vetê mîyan. Nê ziwan zanoxî kî naye rind bizanê ke bi nê herfanê şimayê temaşeyan û bi alfabeya şimaya têmîyan kewtîye kî kar rayê ra nêşono û zerar ra dotî kî çîye nêdana ziwanê ma. A û B ya kirmanckî nêzanê, la pêro bîye ziwan zanox. Heqa şima kesî çîn a ke şima nê ziwanî nîya talan bikerê. Her kes karê xo dime şoro. Her kesî kî rind zano ke karê ziwan zanoxenî karê de ilmîyo, vinderê wa ê we ke wayîrê tercubeyê û ê we ke na rayê de raştî kî sere xo dejnenê wa nê meseleyan êy hal bîkerê.
Goreyê kêyf û refê xo nîbena
Hevalê mayê ke tezde dest bi nustîşê kirmanckî kenê, keremê xo ra wa alfabeya kirmanckî bicerê diqet, goreyê alfabeya kirmanckî binusnê û biwanê. Yane kirmanckî ke nusnenê, bi can û bi royê Kirmanckî binusnê, eke bi can û bi royê Kirmanckî nênusnenê, eke bi ûsul û qeyde kirmanckî nênusnenê, eke bi alfabeya kirmanckî nênusnenê, o waxt heqa kesî kî çîna ke gorê kêyf û refê xo kirmanckî binusno.
Ez nê nusteyê xo de wazena ca biderî alfabeya kirmanckî, ke wa hevalê mayê ke tezde dest bi wendîş û nustîşê kirmanckî kerdo wa cira îstîfade bikero. Vatena mi a wa ke tayê waxtê xo û balê xo biderê alfabe ser û ser o ke tayê bixebetîye şima wendîş û nustîşê kirmanckî zaf rew çareser kenê.
Alfabeya Kirmanckî
Alfabeya Kirmanckî hetê Celadet Alî Bedirxanî ra edi serra 1930 de ama amade kerdene. Yane alfabeya kirmanckî herfanê alfabeya latînkî ra ama amade kerdene û alfabeya Kirmanckî (Zazakî, Kirdkî, Dimilkî)) de 31 herfî estê.
Alfabeya kirmanckîya ke bi herfanê girsa û qican ama viraştene, bi rêze nîya ra:
A B C Ç D E Ê F G H I Î J K L M N O P Q R S Ş T U Û V W X Y Z
a b c ç d e ê f g h i î j k l m n o p q r s ş t u û v w x y z
Wendişê herfe: a, be, ce, çe, de, e, ê, fe, ge, he,i, î, je, ke, me, ne, o, pe. qe, re, se, şe, te, u, û, ve, we, xe, ye, ze.
23 herfê bêvengî: b c ç d f g h j k l m n p q r s ş t v w x y z
8 herfê venginî: a, e, ê, i, î, o, u, û
Herfe kod kerdene: A adir, B bira, C cênike, Ç çêneke, D Dêrsim, E Erzingan, Ê êlege, F fek, G Gimgim, H hemgên, i i, Î îsot, J Ju, jan, K kirmanckî, L lapik, laser, M manga, N non, O oda, P payîz, Q Qelem, R robar, S saye, sole, Ş şit, T toraq, U unîversîte, Û ûca, V veng, verg, W Welat, X Xezal, Z zazakî
Herfê ke alfabeya tirkî de estê lê alfabeya kirmanckî de çînê nêwê: Ðğ, Iı, Öö, Üü. Herfê ke alfabeya kirmanckî de estê lê alfabeya tirkî de çînê ê kî nêwê: Êê, Îî, Qq, Ûû, Ww, Xx