Bi taybet jî sembolên dîrokî balê dikişînin.Di pêşangehê bi giştî heft mijarên sereke hene. Çend mijarên balê dikişînin ev in; aştî, jiyan, dîrok, huner û muzîka gelên Mezopotamyayê. Di tabloyên şêwekar de dîroka ola xirîstiyaniyê û Hz. Îsa cihekî berfireh digirin. Dîsa sembolên dîrokî yên sumeran, asuriyan, babîlan û akadan di pêşangehê de balê dikişînin. Şêwekar Şarro Malke derbirî ku sembolên mezopotamyayê ji bo gelên din bûye bingehek û bingeha xwe li vir digirin.Şêwekar Malke anî ziman ku bi vê pêşangehê ve dixwaze di navbera gelên li vê erdnîgariyê dijîn de bibe bingeha aştiyê û der barê armanca vekirina pêşangehê de ev tişt gotin: “Armanca pêşangehê ji bo aştî û biratiya nav gelan. Dixwazim ev pêşangeh bibe bingehek ji bo aştiya di nav ol û mezheban û çanda vê derê.”


Bi sembolan dîrok
Şêwekar Malke der barê mijara pêşangehê bilêvkir ku dîrok û çanda Mezopotamyayê diya hemû gelên li vir dijîn e û ev tişt gotin: “Dîroka Mezopotamyayê diya hemû gelên li vê derê dijîn e.” Malke der barê tabloyeke sembola asuriyan de wiha got: “Tabloya canegeyê bi bask dibêjin dema asuriyan sembola wan bû. Wêneyê sembola canege hêz ê temsîl dike. Serê însan û şiklê çengê teyr, gewda ga û şêr. Ev wêne vî gelî sembol dike; wekî însan bi aqil in, wekî teyr jêhatîne, wekî ga bi quwet in, wekî şêr qral in.”

Muzîka herî kevn

Malke da zanîn ku dîroka Mezopotamyayê dîrokeke dewlemend e û li gorî texmînan yekem car sumeran amûrê muzîkê bi kar anîne û wiha pê de çû: “Goristanên sumer, babîl û akadan de amurê muzîkê hatiye dîtin. Di sûmeran de muzîk 3 hezar sal beriya niha hebû. Hunera wan e û wisa tê texmînkirin ku li cîhanê muzîka herî kevn a sumeran e.

NAVENDA NÛÇEYAN/AMED