Êyî ra tepîya PKK kewt hewldananê girdeyan miyan û hîrê leteyê bîn ê Kurdistanî de zî dest bi hadreyîyan kerd. Sifte her manaya awankerdişê partîyanê sey PYD-PÇDK û PJAKî tam fam nêkerd. Heme kes vat: “Nê kotî ra vejiyayî?” La dehayê Rayver Apoyî encax bi serran dima ra eşkiyeno bêro vînayîş.
Rayver Apo şiyayîşê halê Rojhilatê Mîyaninî verê ra vîna bî û tam des serr verê bîyayîşan tedbîrê xo girewt bî. Madem vakûr do bibo loqomotîf ganî goreyê êy gamar bi çekerdayê û rolê xo zî kaybikerdayê. Ana zî bî. Tevgerê Apoger xo çar leteyê Kurdistanî de xo kerd rayver û pêşengê şorişî. Finakê nêyî yê tewr şember, helbet şorişa Rojawan o. Rojawan de PYD nêbiyayê se, kam zano halê şarê ma yê reben da senîn bibîyayê.
Yan lepanê çeteyan de mendibî, ya bibiyayê qoleyê Barzanî, yan zî erka Esad Rojawanî de kere kerreyî ser o de nêveradabî. La belê ana nêbî. Estbîyayişê PYDyî yanê estbîyayişê xeta Rayver Apoyî hem can û namûsê şarê ma pawit, hem leteya tewr werdî yê Kurdistanî azad kerd û hem zî heme şaran rê bi çimeya hêvîyan.
Enka ma bêrîme Kurdistano Rojhilatî ser. Merdim eşkeno vajo ke Rojawan êndi azad bîyo. Talûkeyê girde hewna estbê zî, êndi kes nêşeno şarê ma yê Rojawanî sey verî rayîra bibero. La no nîyeno manaya xelisyayîşê heme çiyî. Verniya ma de Rojhilat esto.
‘Şorişê Rojhilatî Rojawanî vêşî do Rojhilatê Mîyanin û cîhanî bileqno’
Goreyê min şorişê Rojhilatî şorişi Rojawanî ra sey qat vêşî do Rojhilatê Mîyanin û cîhanî bileqno. Dînamîka girde yê şorişî Kurdistano Rojhilatî de esto. Verê heme çi erdnîgariya ci sey Rojawanê hîrê lete û deşt nîyo. Heme cayê ci de koyê stratejîk estê û des û hîrê milan kurd pê ser o ciwîyenê. Kurdê Rojhilatî sey Vakûr û Rojawanî vila zî nêbiyê.
Leteyê Rojhilat cayek bol stratejîk ê Kurdistanî miyanê de yo. Nimeyê koyê Qendîlî mîyanê Rojhilatî de yo. No zî yeno a mana ke partî raşta raşt şikino destê xo derg bikero heme cayanê Rojhilatî.
‘Çiyo ke to vinî kerdo, cayê ke to vinî kerdo de bigeyre’
Kurdistano Rojhilatî de welatperwereyek bol xorî esto. Xorîbîyayîşa ci zî na tarîxa bi zerdîn ra yeno. Uca de çand û hunerê kurdayeteyî bi heme renganê xo, yeno pawitiş. Sey ma vakurijan çerxa asîmîlasyonî ra nêameyî vîyarnayîş. Cewher û esasê kurdayetey uca de ciwiyeno û bol zindî yo.
Rayver Apo vano ya: “Çiyo ket o vinî kerdo, cayê ke to vinî kerdo de bigeyre.” Ma zî azadiya xo bi îxaneta Harpagos, verêverkan Rojhilatî de vinî kerdime.
Împaratoreya Medan verê serranî 550’î de, bi îxaneta Harpagosî, Hemedana Rojhilatî de rûxîya. No rûxîyayiş dest pêkerdişê koleteya ma kurdan o.
Heyanî no rewş nêbediliyo zî, ma riyê azadiyê nêvînenême. Ma Rojhilat de vinî kerd û ma do reyna uca de werzîme payan ser…
Sey ke ma sifte zî ard ziwan, kile şorişî Rojawanî de dest pê kerd. No kileya sure bi şorişa Rojhilat de gird û berz bibo. Şorişa Rojawanî nika ra tesîrê xo vilayê heme Mezopotamyayî kerdo.
Qet şik û gumanê ma çînyo ke no kileya Apoger Kurdistano Rojhilatî de zî do gulbang bido û seranserê Mezopotamya, Anatolya û nimgirava Ereban bigeyro bin tesîrê xo. Yanî goreyê min şorişa esasîn ma do Rojhilatî de biveynîme. Ma vengûvazar de hesnenîme. Partî uca de mîyanê hadreyayanê girde mîyan der o.
Tewr peynî KODAR, KJAR û HPJ ame ronayene. No hadreyeyan ma rê yew peyam dano. Ana asîyeno ke perskerdişê hesabê Şîrînan, Ferzadan, Hîkmetan, Elîyan û bi desan şehîdanê bînan tayî mendo. Îdamkerdişê embazan dima ra Rayver Apo: “Ez do nêyî mollayan rê nê verada” vatbî. Ê rojan rê bol nêmendo.
Herinda vatena peynî ez şikina nêyî vaja. Rojawanî dima ra rêza şorişî ameya rojhilatî. Temenê mollayan zî her ke şino kilm beno……(Peynî bi)
Kawayê Asinkar, Rojhilatij o
Reyna cayê rojhilat tarixa Kurdistanî de cîya yo. Xeylê bîyîşê muhîm ê tarîxê ma, Kurdistano Rojhilatî de avera şiyo. Sey finak, navendê kantonî ya. Pêxember û feylesofê siftekên, pîyê heme olan û zanayê ma yo neteweyî Zerdeştê Kal Urmîyeyê Rojhilatî ra vejîyayo. Kawayê Asinkar, rojhilatij o. Destana Newrozî, a ke estanikê azadîyê yê heme şaranê Rojhilatê Mîyaninî yo, Kurdistano Rojhilat de ameya nuştene. Ma tayîna nezdî bêrime se, tarixî de dewleto yewane yê şarê kurd Komara mahabatî zî reyna Rojhilatî de ameyo ronayîş. Ganî merdim Xanê Çengzêrîn o pilingê Keleha Dimdimî-Simko Axayê Şikakî zî xo vîra mekero!
KENAN AVCI / Zindana Tekirdag, hûmar 2, tîpa F