ŞEHRÎBAN ASLAN/AMED

Qezaya Sûrî ya Amedî de 2ê Kanuna 2015î ra nata qedexeyê tebervejîyayîşî dewam keno. Dewlete badê ke 6 taxê Sûrî bi temamî rijnaye, 23ê Gulana 2017î de vera xo daye taxanê Alîpaşa û Lalebeyî û dozer û kepçeyî kewtî taxan. Dima ra taxan de anonsê birnayîşê awe û cereyanê taxe ameyî kerdiş û ame waştiş ke şar taxe veng bikero.

Dima ra taxijî her serê sibayî bi tehdîtêko newe rî bi rî mendî û taxî girîyayî binê abluqa. Aşma Ramazanî de awe û cereyanê şarî ameyî birnayîş. Seba ke şar keyeyanê xo veng bikero, çi destê înan ra ame, kerdî. Aşma Ramazanî de taxan de sifreyê rîyê erdî ronîyayî û hetê herkesî ra piştî dîya şarî. Labelê senî ke aşma Ramazanî qedîyaye, reyna kepçe û dozerî kewtî taxe. Vera rijnayîşî de Endamê Platformê Rijnayîşê Sûrî rê Nê dozgerîye rê gerre kerdî.


Waştî ser înan de birijnî

Çend rojî verê taxe de Keyeyê Tazîye yê Alîpaşa ke şarî bi îmkananê xo viraştbî, ame rijnayîş. No zî nîşan dano ke dewlete çi vera merde û çi zî vera bawerîya şarî de rêze nîşan nêdana. Badê ke dewlete dîye ke nêşena bi rijnayîşê keyeyanê vengan şarî bitersna, na rey zî hewl daye keyeyê ke mîyanê înan de kesî estî, birijna. Dayîka Ayşe Dune û domanê aye seba ke reaksîyon nîşan dayî bi derbkerdiş ameybî tepiştiş û dima ra serbest veradîyaybî. Çend reyan kepçeyan dayî keyeyan ro û bi no hawa şarî tehdît kerdî. Reyna nê rojan de mektebî abîyî, labelê Alîpaşa de mekteb dest pênêkerd. 


ÎHDyî raporêk amade kerd

Dima ra hetê Komeleya Heqê Merdiman (ÎHD) ra çend rojî verê raporêk ame amadekerdiş û rapor de bale ancîyayo nê çîyan ser: 

* Hetê heyetî ra ame dîyayîş ke 22ê gulane ra nata mekteb, camî û sewbîna sazî û dezgeyî zî tede, awe û cereyanê heme taxe ameyî birnayîş.

* Pêvînayîşê ke taxijan reyde ameyî kerdiş de ame dîyayîş ke hêzê ewleyîye taxijî tehdît kerdî û ser şarî de zext û tacîzan meşnayî û heqaretê şarî kerdî. 

* Seba ke awa şimitişî bi tanqan kirişîyaye, bitaybetî doman û extîyarê ke na awe şimitî, emel bîyî.

* Seba ke cereyan çinêbî, keso ke nêweşîya astimî ci reyde estbî û saetanê şanî de nêweşîya ci giran bîye, cîhaz nêameyo xebetnayîş, nêweş zaf zehmetîyî antî.