Her çiqas ke 31 serrî ser ro derbaz bîyî zî tesîrê Qezaya Nukleerî ya Çernobîlî hema zî dewam keno. Ekolojîstî zî vera Santralê Nukleerî yê Akkuyu û Santralê Nukleerî yê Sînopî de hişyarîyê xo kenî, labelê selahîyetdarî goşanê xo padenî.
Babete ser o Verfekê Platformo ke vera Nukleerî de yo Erkan Demîrî qisey kerd.
Demîrî va ’31 serrî verê hedîse qewimîya labelê tesîrê ci hîna dewam keno’ û qiseykerdişê xo wina domna: “Ma hende serran de bi nêweşîye û mergan ra dima zirarê nukleerî dî. Her çiqas ke ma vînenî zî, ewro reyna Mersîn û Sînop de santralê nukleerî virazîyenî. Ma nêzanî ke nê santralan de do qezayêk bibo an nê. 2 raporê ke derheqê Santralê Nukleerî yê Akkuyu de ameyî amadekerdiş, ilmî ra dûrî bîy.
Demîrî dewamê qiseykerdişê xo de va ‘waro ke seba şîrketî ameybî tehsîskerdiş, ma vera ci de doza betalkerdişî akerd û doze dewam kena’ û wina dewam kerd: “Ma bawer kenî ke do haya şaşîya xo de bibî. Helbet keso ke wayîrê wijdanî yo do bivejîyo. Her çiqas ke înşaatê santralî dewam keno zî do fam bikerî ke no şaş o. Labelê ma hêvî kenî ke wa erey nêbo. Ganî merdim bivîno ke no tena Mersîn û Sînop eleqeder nêkeno. Nika bi no hawa vanî qey do enerjî xelq bikerî, labelê raştîya xo de bingeyî welatî de bombe yena bicakerdiş. Ganî merdim nêyî bivîno û bido vindarnayîş.”
DÎHABER /MÊRSÎN