Mixabin, ma hata ewro alternatîfê wendegehanê tirkî nêafirnayî. Honde gonya ma herikiye, la ma her tim derd û meramê xo onca kî bi tirkî ardî zon. Jû tekoşîna bê emane de, ma seweta çinayî dame pêro xo vîra kerd. Sazî û dezgê ma seweta kulturê kurdî kewtî raye, la zono ke ard kar yê xo nêbî. Niya ma ferq nêkerd kemî rê û çinayî rê xizmete keme. Peyniye de ma zonê jû het de caverda bi zonê dewleta kolonyalîste gureyayîme. Na semed ra kî azê ma yê neweyî rê kî îmkanî pêyda nêbîke, zonê xo de pîlbê, biwanê û binusnê. Bi taybetiye roştber, wendekar û nustoxê kurdî zonê xo de alaqadar nêbî. Her tim verê xo çarna tirkî. Siyasetê kurdan kî hen kerd. Siyasetê xo bi zonê kolonyalîstan kerd. Avênêşiyayîsê kulturê ma yê zonî de en guna girse yê siyasetvan, roştber, wendekar û nustoxan a. Çike nînan şarê xorê bi zonê xo rayveriye nêkerde. Vat “ma seweta kurd û Kurdîstan gureyeme” la nî vatîsê xo zono bîn de vatî. Nî guruban her tim tertelê sipî ra qesey kerd, şarê hesna pê, la en jede bi xo tertelo sipe qebul kerd. Feqîr-fiqarê ma, dewizê ma zono xo qesey kenê, zono xo de nornenê, la nî gurubî naye kî besenêkenê. Jû qesê bavûkalan yê almanan esto, vanê: “Awe tavsiye kenê, şereb simenê!” Fênda siyasetvan, roştber, wendekar û nustoxanê ma ki na wa. Par na dem de onca boykot kerdena wendegehanê tirkî rojdemê ma de biye, la ma honde quwetin sero nêvinetîme. Emser îşaretê rindî estê. Sazî û dezgeyê ma hebena rind xo kenê amade. Her ca ra vengdayîsî yenê. KCK ra eskerakerdîs û poştdayîs ame. Hen oseno ke emser tewrbiyayena boykotî hebena quwetin bena. Gever, Cizîr û Baglar jê heremê pîlotî amê weçînîtene. Nî cayan de wendegehî seweta zonê mayan benê ra. Endî alternatîfî peyda benê. Domonê ma besekenê nî wendegehan de bi zonê xo dersan bivînê. Se beno bibo, no alternatîf qisaweta malbatan keno kêmî. Endî manê keşî çîno ke vazo ‘domonê mi perverde ra peyser manenê.’ Tabî rozanê verê ma de hebena beno zelal, wendegehê zonanê mayan miyanê şarî de çiqas alaqa vînenê. La gorê zonayîsê ke hetê KURDÎ-DER û TZP-KURDÎ ra yenê dayene, alaqayade girse esta. Her kes gune poşt bido nî saziyanê ma. Ma zoneme ke polîtîka dewleta AKP bingê tek, tek, tek sero ama ronayene. Serokkomaro tirk Recep Tayyîp Erdogan naye her firset de ano zon. Ma gune dewleta tirkî ra seweta zonanê xo tewa nêpîme, ebi xo dest cikerîme, bimuşîme, biwanîme û avê berîme. Şert û îmkanê naye estê.