Çawdêran delên, mebestî Mesrûr Barzanî le çaksazî, dûrxstnewey destî Nêçîrvan e le damudezgekan da ke maweyekî dûr û dirêj serokî hikûmetî herêm bû.
Bêguman le herêmêk da ke qanûn serwer nebêt, pirojeqanûn hîç sûdêkî nîye û natwanêt gorankarîyek le jiyanî xelk dirust bikat.
ŞASWAR MAME
Hikûmetî herêmî Kurdistan û hîzbe deselatdarekanî Başûrî Kurdistan berdewam basî çaksazî û gorankarî deken. Be taybet le katî helbijardinekan da belênî birîqedar be dengderan deden û çendîn pirojey çaksazî le bware ciyaciyakan dexenerû.
Belam em piroje û bernamane tenha le ser kaxez mawnetewe û neçûnete bwarî cêbecêkirdnewe. Her diway girtinewedestî deselat, hemû belên û bangeşekan lebîr xoyan debenewe. Le mawey 10 salî rabirdûda deyan pirojey çaksazî û gorankarî lelayen hîzbe deselatdar û opozisyonekanî herêm pêşkeş kirawin, belam ta êsta çaksazî û gorankarîyekî ewto bedî nakrêt. Bêguman le herêmêk da ke qanûn serwer nebêt, pirojeqanûn hîç sûdêkî nîye û natwanêt gorankarîyek le jiyanî xelik dirust bikat. Çunke sereray ew hemû belên û pirojane bo çaksazî, barudoxî jiyanî hawlatiyan berew xiraptir royîştuwe û gendelî ziyatir teşeney kirduwe.
Le diwayîn helbijardinî perlemanî herêmî Kurdistan, kandîdî Partî Dîmukratî Kurdistan (PDK) Mesrûr Barzanî belênî da diway birdinewey le helbijardin, dest be çaksazî rîşeyî bikat lenêw damudezgekanî hikûmet û pêdaçûnewe be sîstimî mûçe bikat. Eger çî mawey çendîn mange kabîney nwê desitbekar buwe belam hîç gorankarî û çaksazîyek bedî nakrêt. Ewey bedî dekrêt ladanî komelêk berpirsî îdarîye ke serbe balî Nêçîrvan Barzanî bûn. Şwênî ewan be kesanî serbe balî Mesrûr Barzanî pirkiranewe.
Çawdêran delên, mebestî Mesrûr Barzanî le çaksazî, dûrxstnewey destî Nêçîrvan e le damudezgekan da ke maweyekî dûr û dirêj serokî hikûmetî herêm bû.
Kêşe serwernebûnî qanûn e
Êsta hikûmetî herêm ke lelayen çendîn hîzbewe pêkhênrawe pirojeyekî çaksazî pêşkeşî perleman kirduwe û bangeşey binebirkrdinî gendelî dekat. Eme lekatêkda kêşey herêm nebûnî pirojeqanûn nîye, belkû kêşe serwernebûnî qanûn û cêbecê nekirdinyetî. Herweha serçawey gendelî le sereweye, wate le sê serokayetîyekeye ke lejêr hejmûnî binemaley barzanî dan. Kabînekey Mesrûr Barzanî le xwarewe û le mûçey fermanberanewe gwaye destî be çaksazî kirduwe.
Şarezayanî bwarî îdarî û qanûnî amaje bo ewe deken, çaksazî tenha bewe nakrêt desitkarî mûçey fermanberan bikrêt. Belkû herêmî Kurdistan pêwîstî be çaksazî rîşeyî heye, emeş be gorankarî le sîstimî îdarî û nûsînewey destûr û serwerî qanûn dekrêt. Herêmî Kurdistan ta êsta xawenî destûrêk nîye. Hîzbekan mawey 27 sale rêknakewin leser nûsînewey destûrêk ke corî sîstimî hikûmranî dyarî bikat û bibête zamnî hikûmranîyekî dadperwer û dîmukrat.
Milmilaneyek li barî dabeşkirdinî deselat heye
Mesrûr Barzanî ke êsta deselatêkî gewretrî girtuwete dest, deyewêt lejêr nawî çaksazî çend gorankarîyekî îdarî bikat. Hîç amajeyek bo ewe nîye ke em gorankarîyane lepênaw ewe bin çaksazî le sîstimî herêmda bikrêt. Belkû hemû amajekan ewe delên, le nawerok da kabînekey Mesrûr Barzanî her wek kabîney Nêçîrvan Barzanî debêt. Çunke rwangey herdûkyan le binemaley Barzanîyewe serçawe degrêt. Naşardirêtewe ke maweyekî dûr û dirêje lenêw binemaley Barzanî milmilanêyekî tûnd heye leser dabeşkirdnî deselat. Milmilanêyeke lenêw balî Nêçîrvan, Îdrîs Barzanî û Mesrûr Mes’ûd Barzanîdaye. Zor car nakokîyekanyan geyştuwete astî şer û pêkdadan. Mesrûr Barzanî le diway girtinedestî kursî serokî hikûmet, yekem karî leserkarladanî komelêk berpirsî serbe Nêçîrvan bû. Diyartirînyan Newzad Hadî parêzgarî Hewlêr. Herweha çendîn berêweberî nahye û berêweberî giştî. Hemû em gorankarîyaneş lejêr nawî çaksazî kiran.
Nebûnî opozisyonêkî behêz
Le mawey çend mangî rabirdûda çendîn hawlatî medenî û rojnamewan desitgîr kirawin, emeş pirsyarî zorî lay ray giştî dirusitkrduwe ke hikûmetêk mebestî bêt çaksazî bikat çon debêt mewdakanî azadî raderbirîn û çalakî medenî sinûrdar bikat. Herweha hewlêk heye encumenî balay rageyandin le layen hikûmetewe dirust bikrêt ke çiwarçêwey karî rageyandin le herêmî Kurdistan diyarî dekat. Rojnamewanan rexney tûnd lem hewle degirin û retî dekenewe.
Bizûtnewey goran ke bangeşey ewe dekat be mercî çaksazî beşdarî le hikûmet kirduwe, nayşarêtewe ke gileyî zoryan heye le PDK ke ta êsta hengawî ewtoy nenawe bo çaksazî. Biryarîşyan dawe ke eger ta 6 mang pirojey çaksazî cêbecê nekrêt, ewa helwêstiyan debêt.
Nebûnî opozisyonêkî behêz û karîger le herêmî Kurdistan û karanebûnî rêkxirawekanî komelgey medenî buwete hoy ewey hîzbe deselatdarekan bê bakane mamele biken û çaksazî neken. Emeş buwete hoy bê hîwayî xelk le gorankarî û çaksazî. Le rabirdûda deselatî PDK û YNK hokarî nebûnî mûçey fermanberan û xizmetguzarîyan bo ewe degerandewe ke hikûmetî Êraq bûdce nanêrêt bo herêmî Kurdistan. Belam lekatêkda peywendîyekanî herêm û Bexda ta radeyek asayî bûnetewe, hîç biyanûyek nemawe bo dirêjekêşanî kêşey mûçey fermanberan. Hikûmet qerzî çendîn mangî mûçexoranî le laye û hêşta neydawetewe. Lekatêkda berdewame le firoştinî newt be Turkiya.