Çalakîya grevê vêşanîye ya Nurîye Gulmene û Semîh Ozakçayî ke seba agêrayîşê kare xo daybî destpêkerdiş, roja 247. de dewam kena. Seke yeno zanayîş çalakgêran ra Gulmene hîna zîndan de ya û rewşa aye baş nîya. Ozakça zî verê cû amebî tehlîyekerdiş û keye de çalakîya xo domneno.
Heto bîn ra çalakîyê ke seba piştîdayîşî yenî viraştiş zî dewam kenî. Nê çalakîyan ra yewe zî çalakîya ke her roje bi hawayo sîstematîk Cehdeyê Yukselî de dewam kena ya. Çalakgêrî her roje bi vatişê ‘ma karê xo tepîya wazenî’ seba ke vernîya Abîdeya Heqê Merdiman ya Cehdeyê Yukselî de îzehet bidî, kom benî. Labelê polîsî destûr nêdanî çalakgêran. Polîsî hêriş kenî û çalakgêran tepişeni û îşkence bi înan kenî.
Dormeyê Abîdeya Heqê Merdiman ya Cehdeyê Yukselî 22ê gulane ra nata bi barîyeranê polîsan padaye yo. Heta nika çalakgêrî nêşînaybî nê barîyeran derbaz bikerî. Labelê ewro serê sibayî çalakgêrî Nazan Bozkurte û Celîl Aslan barîyeranê polîsan şiknayî û derbazê warî bîyî. Çalakgêrê ke destê înan de dovîzê Gulmene û Ozakça estbî, sloganî eştî. Çalakîye ra dima Bozkurte û Aslan ameyî tepiştiş.
Turkdogan ame tepiştiş
Komeleya Heqê Merdiman (ÎHD) zî hewl daye ke raporê neheqîyê ke yenî kerdiş, Cehdeyê Yukselî de vernîya Abîdeya Heqê Merdiman de rayapêroyî rê aşkere bikero. Badê ke Hemserekê ÎHDyî Ozturk Turkdogan û îdarekarê ÎHDyî seba aşkerekerdişê îzehetî israr kerdî, raştê mudaxaleyê polîsan ameyî. Turkdogan û îdarekarê bînî Cehdeyê Yukselî de ameyî tepiştiş. Reyna polîsan bi îşkencekerdişî muxabîranê Ajansa Mezopotamya cayê çalakîye ra dure kerdî.
Heto bîn ra endamê Komîsyonê Cigêrayîşê Heqê Merdiman parlamenter Velî Agbaba, Zeynep Altioke, Şenal Sarihane, Fîkrî Saglar, Mahmut Tanal û Gamze Akkuş Îlgezdîye seba ke Gulmene û Ozakça hetê komîsyonî ra bêrî zîyaretkerdiş, muracat kerdî.
NAVENDÊ XEBERAN