Parlamenteranê HDPyî yê Amedî dayî zanayene ke çalakîya Leyla Guvene hemverê tecrîdî de qîrayîşêk a û ganî no qîrayîş bêro eşnawitene û vatî: “Tecrîd bi usûlanê cîya cîyayan yeno xorî kerdene. Rolê Ocalanî zaf muhîm o. Çalakîya Guvene qîrayîşêk a û ganî bêra eşnawitene.”

Hemsereka Kongreya Komela Demokratîke (KCD) û parlamentera Partîya Demokratîke ya Şaran (HDP) ya Colemêrgî Leyla Guvene  seba wedarnayîşê tecrîdê serê Rayberê Şarê Kurdî Abdullah Ocalanî  8ê teşrîna peyêne de grevê vêşanîye daye dest pêkerdiş û çalakîya Guvene ewro roja 28. de dewam kena. Her hetê Kurdistan, Tirkîye û Erwopa ra piştî dîyena çalakîya Guvene û Amed de zî seba paştîdayîşê çalakîya Guvene grêve vêşanîye ame dest pêkerdene.

Parlamenterê HDPyî yê Amedî Selçuk Mizrakli, Dersim Dage, Semra Guzele û Musa Farisogullari yê ke grêve vêşanîye de yê derheqê tecrîdo giranerde, çalakîya Leyla Guvene û hêrişê polîsan ser o qisey kerdî.

Rolê Ocalanî zaf muhîm o

Selçuk Mizrakliyî qiseykerdişê xo de bale ant muhîmîya rolê Ocalanî ser û va: “Seba çareserkerdişê meseleya kurdî û hewlîya Tirkîye tecrîdê serê Birêz Ocalanî ganî ca de bêro wedartene. Wextê prosesê aşîtîye de her kesî dî ke rolê Ocalanî zaf muhîm o. Coka çalakîya Guvene qîrayîşêk a û ganî hetê her kesî ra bêra eşnawitene.”

Nêeşkenî xoverdayîşê ma bişiknî

Semra Guzele zî vist vîrî ke verê weçînayîşanê cayîyan hêrişê serê partîya înan zêdîyayî û va: “Dewlete bi nê hêrişan hêtek ra zî wazena ke tecrîdî bido vîrakerdene. Bi nê hêrişan wazenê ke şar verê înan de çok bido ro la ma verê zext û hêrişanê înan de milê xo çewt nêkenî. Ê rixmê heme hêrişan nêeşkenî xoverdayîşê ma bişiknî.”

Bi usûlanê cîyayan tecrîdî xorî kenî

Musa Farisogullari zî  waşt ke tecrîdo girankerde ke serê Ocalanî de yeno domnayene ca de bêro wedartene û wina domna: “Tecrîdo ke 19 serrî yo dewam keno 3 serranê peyênan de bi usûlanê cîya cîyayan yeno xorîkerdene. Çalakîya Guvene heqêko fermî û demokratîk o. Hukmat ganî goş bido nê vengdayîşî û nê waştişanê meşrûyan qebul bikero.”

Çalakîyê ma do bêrî vilakerdene

Dersim Dage zî hêrişê polîsan ê serê çalakwanan ê Mersînî vist vîrî û va: “Ma 5 bajaran de dest bi grevî kerdbi. La hêrişê polîsan ê Mersînî ra dima heme bajaran de vera hêrişê polîsan û paştîdayîşê Guvene qerarê çalakîyan ame girewtene. Çalakîyê ma do bi vilabîyayîşî dewam bikerî. Ma reyna vanî waştişê Guvene waştişê ma pêrunan o.”

 

AMED