Çalakîyê protestoyî yê Almanya bi rojan o ke dewam kenî. Çalakgêran roja şeme ocaxê madenî yê Garzweîllerî girewt xo dest. Ame musayene ke çalakgêran seba ke fealîyetanê ocaxo ke hetê şîrketê enerjîyî yê RWE ra yeno îdarekerdene bivindarnî, wina kerdo.
Çalakgêran rojêkê verê cu zî santralanê komirî ra yê Neurathî dagîr kerdbî û fealîyetanê nê santralî ameybî girankerdene. Seke yeno zanayene çarçewaya girdkerdişê ocaxê Garzweîllerî de dewa Keyenbergî rijîyayîşî reyde têrî mendbî û Tevgerê Frîday for Future 8 hezar wendekarî aye dewe de ardî têhet.
Verfekê Ende Gelande Kathrîn Hennebergere îzehetê ox de va ‘Nê çalakîyî seba hêvîkerdişî sebeb î’ û wina domnaya: “Vera binkewtişê sîyasetmedaran de bi hezaran kesî tîya de seba edaletî mesaj danî. Wazenî wa çalakîyêk bibo, wazenî wa grevêk. Nê çalakîyî seba ke peynîya demserê fosîlî bîyarî, yenî viraştene.”
Roja îne bi vengdayîşê tevgerê Frîday for Future 16 welatan ra 40 hezar kesî bajarê Aachenî yê Almanya de seba ke komir nêro bikarardene rayîra şîbî. Seke yeno zanayene Almanya 2011 de qerarê bikarnêardişê nukleerî girewtbî. No qerar ra dima tevgerê ke vera bikarardişê komirî de yî bîyî muhîm. Hukmatî demêk verê cu qerar girewtbî ke heta 2038î ê do bikarardişê komirî biqedêno. Labelê dorûverpawitoxan nê tarîxî zaf erey dî û coka vera nê qerarî de reaksîyonî yenî nîşandayene.
ANF / BRUKSEL