Li Hamburgê, di çalakiya Çarşemê ya bi pêşengiya Meclîsa Jinan a Rojbîn de her hefte bi dirûşmaya, "Hûn bêdeng in, ji ber hûn sûcdar in" tê lidarxistin de, daxwaza ronîkirina komkujiya Parîsê û cezakirina sûcdaran hat kirin. Di axaftina li ser navê Meclîsa Jinê ya Rojbîn de hat ragihandin ku jin 602 roj in li edaletê digerin û hat gotin ku dewleta Fransa naxwaze vê cînayetê ronî bike. Parlamentera Partiya Çep a Hamburgê Cansû Ozdemîr jî di axaftina xwe de bal kişand ser trajediya mirovahiyê ya li Şengalê û bi taybetî jî hovîtiya jin lê rast tên.

Li bajarê Dusseldorfê jî çalakiya ku her hefte pêk dihat vê hefteyê jî li ber seferatxaneya Fransayê pêk hat. Li ser navê Meclîsa Demokratîk a Bonnê axaftin hat kirin û di axaftinê de hat diyarkirin ku bila kujerên komkujiya Parîsê bên darizandin û hat gotin ku heta komkujî ronî nebe dê çalakî bidome. Li paytexta Belçîka Brukselê jî çalakiya "Bêdengiya we ji hevkariya we tê?" dewam kir. Di çalakiya li ber Konsolosiya Fransayê de wêneyên 3 jinên şoreşger ên Kurd, posterên Rêberê Gelê Kurd Abdullah Ocalan û alên KJB'ê hatin hildan. Li Marsîlya ya Fransayê jî bi heman armancê meş pêk hat. Meş ji aliyê Tevgera Jinan a Kurd ya Ewropayê pêk hat. Di meşa ku ji qada Canebîere destpê kir de li gel komkujiya Parîsê komkujiya DAIŞ’ê li Şengalê pêk anî û êrîşên der barê Rojava de hatin şermezarkirin. Li paytexta Awûstûrya Viyanayê, çalakiya roja Çarşemê ya ji bo aşkerakirin û darizandina kujerên Cansiz, Dogan û Şaylemez tê lidarxistin, duh dewam kir. Di çalakiyê de pankarta bi zimanê Elmanî û Fransî ya bi nivîsa "Em edaletê dixwazin" a ji wêneyên Cansiz, Dogan û Şaylemez hat hilgirtin.

NAVENDA NÛÇEYAN