Seke yeno zanayene 2ê teşrîna peyêne Roja Vernîgirewtişê Bêcezamendişê Sucê ke Vera Rojnamegeran de Yenî Kerdene ya û UNESCOye bi wesîleya na roje îzehetêk daye. UNESCO îzehetê xo de qala rojnamegerê ke yenî qetilkerdene kerda.
Goreyê îzehetê UNESCO dinya de her çar rojan de rojnamegerêk yeno kiştene û 2006 ra nata pêro pîya 1096 rojnamegerî ameyî kiştene. Goreyê UNESCO tena emser 86 rojnamegerî kişîyayî. Îzehet de bale ancîyaya rojnamegerê ke 2017 de kişîyayî ser û ameyo vatene ke zafaneyê rojnamegeran herêmanê pêrodayîşan de kişîyayî.
Goreyê îzehetî 2017 de seba rojnamegeran cayê tewr tehlukeyin herêmê Asya û Pasîfîk î. Dima ra herêmê Amerîkaya Latîne û Karayîp yenî. Reyna welatê ereban û Afrîka zî seba rojnamegeran tehlukeyin î. Seba rojnamegeran welato tewr tehluke Meksîka ya. Par Meksîka de 13 rojnamegerî kişîyayî.
Sereka UNESCO ya Almanya Marîa Bohmere zî va ‘kişîyayîşê Cemal Kaşikçiyî ver herkes mat mend’ û wina dewam kerde: “Çapemenîya azade Ewropa de zî yena tehdîdkerdene. Kişîyayîşê rojnamegeran suco tewr giran o. Bi hawayo kêfî tewqîf kerdene, îşkence û dest ronayîşê ser malzemeyanê cigêrayîşî hetê azadîya çapemenîye de nînî qebul kerdene.”
PÎRHA / STENBOL