Parlamenterê HDPyî yê Anqara û Verfekê Heyetê Îmrali Sirri Sureyya Onderî derheqê proseso ke Tirkîya ti ra vîyarena de vînayîşê xo ard ziwan.
Onderî qiseykerdişê xo de vatişanê Rayberê Şarê Kurdî Abdullah Ocalanî ke wextê pêvînayîşan de vatbî ‘eke no firsend zî biagêro nêçareserî, do hêrişî gird bibî. Eke problemê kurd çareser nêbo do derbe bikewo dewre û bi hezaran merdimî zî bimirî’ ard vîr û wina va: “Heme vatişê Birêz Ocalanî raşt vejîyayî û averşîyayîşê herême zî goreyê vatişê ci qewimîyayî. Reçeteya çareserî zî ewja de bî; çimkî Birêz Ocalanî seba çareserî sîyaseto demokratîk, îradeya aştî û têkoşîno ke bi demokrasîyêka radîkal pê ameyo pêşnîyaz kerdbî. Ewro çîyo ke lazim o ma bikerî, ganî ma warê sîyaseto demokratîk hîra bikerî û sere de azadîya embazê ma yê ke ameybî tewqîfkerdiş, azad bikerî û sey rojeva xo ya esasî bigirî dest.”
Bedelê ci giran bî
Onderî dewamê qiseykerdişê xo de va ‘peyman, têkîlî û polîtîkayê şerî ke Tirkîya tercîh kerdo, vernîya cuyayîşî de astengîyêka gird awan kerdo’ û wina dewam kerd: “Bedelê nînan xeylê giran bî. Ma hêvî kenî ke nika Tirkîya polîtîkayê ke kurdan rê dişmen î û vera statuya kurdan de asteng benî ra fek verabido. Eke wina nêkerî do prosesê kaos û nêçareserî derge bibo. Cok ra ma do her tim nêyî bîyarî ziwan û goreyê nêyî hereket bikerî. Nika yê ke welat îdare kenî, vera kurdan de nefretêko gird awan kerdî û vera nêyî de wezîfeyê ma no yo ke ma sîyaseto demokratîk û aştî awan bikerî.”
Îxtîmalê nêvîyartişî
Onderî bale ant bedilîyayîşê qanûno bingeyî û wina va: “No bedilîyayîşê qanûno bingeyî ke do bêro meclîs, awankerdişê hegemonya ra zêde ti manaya ci çin o. Mîyanê nê bedilîyayîşî de seba demoratîkbîyayîşî çîyêk çin o û cok ra îxtîmal esto ke referandumê Heyetê Pêroyî de 330 reyan nêgiro. Goreyê mi îxtîmalo ke nêreso 330î, îxtîmalê resayîşî ra zêde yo. Çimkî ma vînenî ke AKP û MHP îknakerdişê merdiman de zehmetîyan ancenî.”
Onderî peynîya qiseykerdişê xo de qala rewşa Ocalanî zî kerd û wina qedêna: “Bêxera munaqeşeyê ma yê ke ma raya pêroyî de kenî, sewbîna ti kanalê pêvînayîşî çin î. Destê ma de tena vatişê Ocalanî yê peyên ke vatbî ‘ez eşkena şertê xo yê ewleyîye awan bikera’ esto û sewbîna zanayîşêk destê ma de çin o. Bêhuzurîya ke nika welat de esta, sîstemê tecrîdî ra girêdaye yo. Eke wextê xo de vera sîstemê tecrîdî yê Îmrali de çîyêk biameyêne kerdiş, ewro do hende tepiştiş û tewqîfkerdişî nêbîyêne. Ma do prosesêko hîna giran ra derbaz bibî û beno ke sey welat ma zaf bibetilî, la goreyê mi do peynî baş bibo.”
DÎHABER / ANQARA