Hemsereka Konseyê Caardişî ya Federasyonê Demokratîke yê Sûrîyeya Vakurî Foza Yusufe derheqê pêvînayîşê Astana, operasyonê Rizgarkerdişê Reqqa û pêvînayîşê Trump û Erdoganî de qisey kerde.

Yusufe qiseykerdişê xo de va ‘hêzo ke sebebê krîzî yo nêşêno bibo çareserî’ û qiseykerdişê xo wina domnaye: “Goreyê ma Peymana Astana seba aştî û îstîkrarê Sûrîye xizmet nêkena, Tirkîya rê rayîrêk bîn yê seba dagîrkerî akena. Cok ra dewleta tirk ewja de wina aseno ke do bedilnayîşê nufûsî ra bigîre, heta qirkerdişî do heme çî bikero. Amerîka û Rûsya destûr dayî Tirkîya ke ser Cerablusî ra bikewo Sûrîye û na şaşîyêka gird a. Ewro eynî şaşî Îdlîb de zî yena dibarekerdiş. Astana teberê îradeya Federasyonê Sûrîyeya Vakurî de ya. Cok ra nêbena çareserî. Eke Tirkîya bikewo Îdlîb, no seba Efrînî tehdîtêko gird o. Seba ke projeyê ma yo demokratîk veng bivejo, Tirkîya heme çîyan kena. Kewtişê Tirkîya yê Îdlîbî yeno manaya şerêko newe.”

Her kesî gêno mîyanê xo 

Yusufe bale ante hemleya azadkerdişê Reqqa ser û wina dewam kerde: “Seba azadkerdişê Hemleya 4. ya Xezebê Firatî zaf muhîm a. Cayê ke HSD azad keno, teslîmê meclîsan keno. Şeddadê ra heta Minbicî tim wina bî. Meclîsê ke yenî awankerdiş zî goreyê nîjadan nîyî û seba ameyoxa Sûrîye nimûne yî. Nika Tebqa ame rizgarkerdiş do dima ra zî Reqqa bêro azadkerdiş. No hêvî dano merdiman. Rojawan de şorişo esil hetê komelkî de yeno cuyayîş. Serkeweno; çimkî no sîstem her kesî gêno mîyanê xo û mîyanê xo de hewêneno.”

Çîyêko tesaduf nîyo 

Yusufe qiseykerdişê xo de qala pêvînayîşo ke Erdogan do Trumpî reyde bikero, kerde û wina va: “Dewleta tirk qeraro ke demo peynî de Amerîka girewto ver eciz a. Çimkî dewleta tirk hema zî polîtîkayanê xo goreyê Şerê Cîhanê 1. û 2. meşnena û bi eynî perspektîfî nizdîyê Şerê Cîhanî yê 3. bena. Helbuk zaf çîyî bedilyayî. Hem Tirkîya hem zî Rojhelato Mîyanên bedilîyayî. Reyna kurdî û rolê înan bedilîyayî. Nika Tirkîya mîyanê krîzêk de ya; çimkî goreyê ruhê donemî hereket nêkena. Eke wina bikerdêne do qezenç bikerdêne. Nika zî Erdogan hewl dano ke pêvînayîşê Trumpî de çîyo ke vera kurdan de Trumpî ra bigîro. Pêvînayîş de estena tayê kurdan zî tesaduf nîyo. Çi heyf ke Tirkîya kewta rayîrêk û ver bi kaşî şona. Ancax vera xo bitado eşkena xo bixelisna. 

Çareserîyêka îdeal a 

Yusufe peynîya qiseykerdişê xo de qala rol û berpirsîyarîya Amerîka zî kerde û qiseykerdişê xo wina qedêna: “Rol û berpirsîyarîyêka girde kewena milê Amerîka ser. Tirkîya de problemê kurd û demokratîkbîyayîşî esto. Çareserîya problemê kurdî kîlîtê îstîkrarê Rojhelato Mîyanênî yo. Heto bîn ra pîyabîyayîş meseleyêk o û çar parçeyan de çar dewletan zî eleqeder keno. No het de Amerîka eşkena teşwîq û mabênkarî bikera. Seba Tirkîya zî ya tewr bi xêrên no yo. Tena seba kurdan nê, seba heme bawerî û nasnameyê bajarê Sûrîye de cuyenî rê federasyon çareserîyêka îdeal a.”


BÊRÎTAN SARYA / ANF / QAMIŞLO