Polîtîkayê ke Kurdistan û Tirkîya de yenî ramitiş benê sebebê kûrbîyayîşê krîzê ekonomî. Esnafê ke vaybîyayîşê Dolar û Euroyan ra tesîr bîyî, wazenî ke wa krîz rê çareserî bêro dîyayîş. Esnafê Amedî qala çareserîya krîzê ekonomî kerdî.Esnafan ra Recep Kumruyî qisey kerd û wina va: “Krîzê ekonomî ra tewr zaf şarê herême tesîr beno û esnafî zî dikananê xo padanî. Kar sera 50 kêmîbîyayîş esto.”
Çareserî aştî ya
Esnaf Şahabbettîn Ugurî dîyar kerd ke ê zaf rojan karêk daxî nêkenî û wina va: “Sebebê kûrbîyayîşê krîzê ekonomî şer û polîtîkayê ke AKP Kurdistan û Tirkîya de dana meşnayîş o. Xoverdayîşê Sûrî de bi aşman dikanî padaye mendî. Her çiqas ke qedexeyê tebervejîyayîşî ameyo wedarnayîş zî her ca de nuqtayê polîsan ameyî ronayîş. Her roje ma hîna zaf benî deyndar. Seba çareserîya krîzî, ganî herême de rewşa OHALî bêro wedarnayîş.”
Rewşa kaosî ver nika turîstî nînê Tirkîya
Esnaf Îlyas Karagozî zî wina va: “Tîya de tewr zaf turîstî herînayîşan kerdênê. Rewşa kaosî ver nika turîstî nînê Tirkîya. Hûmara turîstê ke Tirkîya de yî zî kêmî bîya. Badê ke Tirkîya de OHAL ame îlankerdiş, rewşa ekonomî serûbin bîye. Ma par 4 kesî dikan de xebetîyayênê, labelê emser yew kes daxî zêde yo. Verê 4 şûbeyê ma estbî, nika ma yew dikan verdayo. Çareserîya başbîyayîşê ekonomî, wedarnayîşê OHALî ya.”
MELEK YUKSEL / AMED - ANF