Bi wesîleya Çarşema Sîya ceniyê Dersimij şî Jara Gola Çetû, çira fiştray ci û seweta ameyina haştî dûa kerdî.
Îmam Huseyîn û 72 alwozê ci, tarixa 680’î de hetê artêşa Xalîfeyê I. yê Emewiyan Yezîd’î Kerbela de amey qetilkerden. Nayî ra hometa alewî, hefteya sifteyin yê aşma Adarî de roja Çarşem zey ‘Çarşema Sîya’ biname kena û matem cêna. Alewiyê Qizilbaş hîrê hefteyê aşma Adarî de matem gênê, her roja Çarşem cayanê bimbarek de îbadet kenê. Herzewbîn no wextî de sereyê heywanan û yê daran nîno cikerden.
Dersim de kî, bi wesîleya Çarşema Sîya ceniyê ke azayê Komeleya Alewiyê Demokratîk ê, jew cayê bimbarek Jara Gole Çetû ke çemê Mûnzûr û Pilemûriye resenê pê, mekanê Xizirî de merasîmê vîrarden viraştî.
Kerbela ewro kî ramena
Bi desan ceniyê ke tewrê merasîm bî na ca de çirayî fiştray ci û seba ameyina haştî dûayan kerdî. Azaya Komeleya Alewiyê Demokratîk Ayten Şîmşîr merasîm de qisey kerd û hayr ant qetlîama Kerbela û qirkerdenê Îmam Huseyîn û alwozanê ci ser. Şîmşîr da zonayen ke, wehşeto ke Kerbela de qewimiya, ewro kî Sûr, Sîlopî, Cizîr û Nisêbîn de rameno. Şîmşîr aşkere kerd ke, “Hometa alewî dûştê qetilkerdişê şaran û merdişê ci de rê û niya va: “Seweta haştî rê çira fiştrayen ameyime mekanê Xizirî, Jara Gole Çetû. Ma dûa û nîyazê xo yadê haştî kerdî û ma dê bikerê. Azaya DAD Sakîne Ertûgrûl kî veng da Emîne Erdogan û pêrokîn mayan ke serva verîgirotisê merdisan bikewê hereket. Pey qiseyan ceniyan serva haştî, weşî û rindekî çirayî fiştray ci û niyazî kerdî vila.
Dûstê qetlîaman bikewê hereket
Heto bîn ra, Pîrê Ocaxê Avûçan Hasan Genç’î kî derheqê Çarşema Sîya de qisey kerd û vist vîrî ke zihnîyeta ke Kerbela de qetlîam viraşt ewro kî dewam kena. Genç’î aşkere kerd ke Çarşema Sîya her roj newede ra qewimena û niya va: “Ewro pitikê hîrê aşmî yenê kişten. Tecawizê ceniyan kenê, sûretê ci ancenê û teşîr kenê. Ti wijdan û edalet nayî qebûl nêkena. Bi nê qetlîaman ma onca Çarşema Siya cuwyenê.
Pîr Genç’î verniya Çarşemanê Sîya venga jûbiyîn kerd û niya va: “Bi desan gencê ma şehîd bî. Bi aşmano dayikê ma nêşkenê cenazeyanê xo bicîrê. Gencî, cenî, domanî mirenê. Kerbela de 72 canî merdî, la Cizîr û Sûr de bi hezaran kes merdî”. Hasan Genç’î herkesî ra waşt ve verniya qetlîaman bikewê hereket.
DÎHA/DERSIM