Reya Haq ra pîya cem û civatî kî amey qedexe kerden.Alewîyê qizilbaşî nê qedexeyan êrişê dûştê îtiqatê xo hesibnenê û na mesajî danê: ‘Eke hardê ma bejî bo, darê ma bimirê, awe ma hêrs bê, nêşkeme biciwime, nayî ra wayîrvejyayenê waranê bimbarek yê ke nefes û omid danê ma ra şima nêşkene manî bê.
Hemseroka Komeleyê Alewiyê Demokratîk Ayten Şîmşîr vist vîrî ke bi tometkerdenê cayanê bimbarek, alewî reyna bîn amey tecrîdkerden. Şîmşîr da zonayen ke alewî bi serranê derg o raştê tecrîdî yenê û va: “Nika kî bin qilifê OHALî de nîşangeh, zîyaretgehê ma kî amey tometkerden. No çiyekê dûştê heqanê mordeman o.
Êrişê dûştê bîyayişê ma yê’
Ayten Şîmşîr aşkere kerd ke şima dinya de şinê kata şirê azadîyê îbadet û îtiqatî esto. Şîmşîr da zonayen ke alewî bi kemerr, hard û koyanê xo bîyê jû û nîya va: “Nayî ra qedexekerdenê şîyayişê ma yê nîşangeh û zîyaretgehanê ma êrişê jûbîyayen û bîyayenê ma yo.Na sewet ra ganî wayrê cografya, waranê weşî, îtiqat, zon, kultur û zîyaretgehanê xo vejime. Zewbîn ma vera çinîbîyayen sonime.”
Hemseroka DAD Ayten Şîmşîr vist vîrî ke bi qedexeyan rîyê bîn yê polîtîkayanê asîmîlasyonî vejyeno ver û nîya dewam kerd: “Ti quwet û dewlet nêşkena azadîya îtiqatî yê însanan qedexe bikero.” Şîmşîr da zonayen ke hefteya peynî yê aşma Tebaxî de zîyaretgehan de geyrayişî dê virazîyê û vist vîrî ke navendê îtiqatan tarîx û şîyayişê alewîyan o. Şîmşîr vist vîrî ke tarîxê nuşteyî yê alewîyan çîno, tarîxekê yeno ciwîyayen esto û va: “Nê kî merkezê îtiqatê ma yê. Nayî ra gerek wayrê merkezanê îtiqatê xo bivejime.
Nêşkeme şime îbadetxaneyan
Temsîlkarê Komeleya Ocaxê Bawa Kureyş yê Dûîsbûrg Erkan Akyuzî kî da zonayen ke serva zîyaretê Ocaxî ê şîyê Dersim. Akyuzî aşkere kerd ke Ocaxê Kureyşan bi qedexeyan wazenê bierzê plana peynî û nîya dewam kerd: “Verîya 2 hefteyan ma vejîyayî Bawa Duzgunî. Nazîmîye ra jew fermandarî va ‘şireft ra hetê cor nîro vejyayen’. Tepê Zargovît esto. Şikefta ke rêçê Bawa Kureyşî esta, la kes nêşkeno şiro ûzka. Verîya coy dewijî îta ra bi payan şî Bawa Duzgun. La nika rîwalo ke qedexe yo mecbûr Nazmîye ra bi wesaîtî şinime.
Akyuz waşt ke zextê ke dûştê cayanê îtiqatî yê Dersim yenê ramiten desinde bîrê wedarnayen û veng da partîyanê sîyasî û rêxistinanê demokratîk ke seweta wedarnayişê qedexeyan veng biderê.
Mayanê Ocaxê Kureyşanî ra Rahîme Kizilkan zî da zonayen ke rîwalê festîval zîyaretê Ocaxî bîyê jêde. Kizilkan vist vîrî ke rixmê tometkerdenan hewl danê ke îbadetanê xo bîyarê ca û qiseyê xo bi nê vatenan qedîna: “Ganî wayrê îtiqatê xo bivejime. Jîyarê ma çêberê îtiqatê ma yê. Ma wazenime dewanê xo de bi serbestî weşî bikerime.
DÎHA/DERSIM