‘KONGREYÊKA TARÎXÎ BÎ’
Nabênê 30ê çele û 1ê Sibate de organîsazyonê têkoşînê cinîyan DOKH xo fesh kerdibî û şibî kongre. DOKHî Kongreya xo de nameyê xo bedelnabi û kerdibi Kongreya cinîyê Azad (KJA). KJA nika ra lez da xebatanê xo û mîyanê xo de hetê îktîsat, komel û kultirî de nîqaşan kena. KJA wazena xebata xo ya newe de biresa heme cinîyan û semedê organîzekerdişê heme cinîyan komîsyona "Ma senî bikere?" awan kerd. Aktîvîsta KJA ra Zeynep Boga derheqê rol û mîsyonê KJA de qisey kerd û îzeh kerd ke înan kongreya KJA ra ver pê komîsyonnan û pê 501 delegeyan mîyanê xo de xebate kerda. Boga vat ke, na kongre semedê ma û Tirkîya kongreyêka tarîxî bî. Têkoşînê cinîyan de tecrubeyê 30-40 serran esto. Ma no tecrube ra îstîfade kerd. Eke no têkoşîn nêbîyêne ma nêeşkayênê bêrê na merhele. Ma nika hetê nîtelîk û nîcelîkî de bîyê qewetêk. Nika vernîya ma akerde ya. Eke ma bieşke birese heme cinîyan o wexto ma hina zêde raver şînê.
'Ma Kobanê înşa kenê'
Boga îzeh kerd ke nika Rojawan de cinîyê Kurd rayverîya şorişî kenê, na zî semedê înan çîyêko zaf vatedar a û wina vat: Cinîyanê Kurdan Rojawan de xo ispat kerdo. Hem dinya qehremanîya cinîyan dî. Cinîyê Rojawan heme dinya de heme cinîyê bindestan ra bîyê nimune. Ma şorişê Rojawanî ra zaf çî musayê. La sek yeno zanayîş Kobanê de kerra kerra ser o nêmenda. Oca de merdimatî qezenç kerda la semedê pêrodayîşan Kobanê zaf texrîp bîyo. Lazimo Kobanê newe ra înşa bibo. Ma cinî gere înşakerdişê Kobanê zî bigêr xo mil ser o. Ma wazenê viraştişê Kobanê de biaktîf ca bigêre. Tena hetê fiîzîkî de ney her het de ma gere heme rojawan înşa bikere. ma senî ke şer de rayver bî înşa de zî benê rayver. înşakerdişê Kobanê deynê milê ma yo. Ma sey KJA do înşakerdişê Kobanê de biaktîf rayvertî bikere.
BERÎTAN ELYAKUT/JINHA-AMED