Nefretê tirkanê faşîst û îslamîstan ameyo dereceyê dişmenîya cenaza û goranê (mezelanê) kurdan. ”Grûb”êda faşîst û nîjadpereste ya tirkan ya fekgilêşkine paytextê Tirkîya Anqara de, 13ê êlule de hêrişê cenazaya maya Aysel Tugluke, Xatûn Tugluke, kerd û va ”tîya cayê kurdan, elewîyan û ermenîyan nîyo; tîya cayê şehîdanê ma yo, şima nêşenê na cenaza tîya de defn bikerê.” Merdimanê Xatûn Tugluke cenazaya xo gore (mezel) ra vete û berde Dêrsim de defn kerde. No hedîse tena reyna îspat keno ke Tirkîya ver bi dewleta IŞÎD ya şina. 

Ez verê heme çî dejê Aysel Tugluke û merdimanê ci zerrî ra bare kena. Wa sereyê înan weş bo. Ez nê hêrişî bi nefret û hêrsêndo gird a lanet kena! Na dişmenîye û no heqaret, şexsê cenazaya Xatûn Tugluke de, ma kurdan pêrune rê bîyo. Helbet, eke ma bizanê. Çi heyf ke  tayê kurdê ke hewna no mesele weş fehm nêkerdo û na dişmenîya tirkan kenê qurbanê hêrs û korîya xo ya sîyasî û nê wehşetê tirkan mazûr vînenê û vanê: ”Ox bîyo, Aysel Tugluke û xeta aye ya sîyasî hemkarî bi tirkan a waştê, wa tirkî çimanê înan zî vejê, înan no hêriş heq kerdo.” Bêguman helwestê Aysel Tugluke yê sîyasî zî kes şeno rexne bikero. Labelê merdimêda ke na dewlete seba fikranê ci aye kerda zîndan, seba cenazaya maya xo di rojî îzin giroto û faşistî hêrişê cenazeyê maya ci kenê.  Ê kurdê ke rojênda wina sey firsetî vînenê û Aysel Tugluke rexne kenê zî mi gore, hem exlaqê sîyasî ra hem zî yê kurdî ra dûr ê. Kulturê ma kurdan de, ke ma pê ra hes nêkerê zî, ma şinê tazîyeya yewbînan û ma wextê şînî de pê ra çîyanê xiraban nêvanê. Ke hesabêndê ma pîya bibo zî ma ê hesabî verdanê wextna. 

Çirê cenazeyê Xatûn Tugluke? Xatûn Tugluke cinî ya, kurd a, elewî û dêrsimij a. Nê çar heme taybetî zî seba hêrişê tirkanê îslamîst, nîjadperest û faşîstan bes ê û vêşî yê zî.  

No nefret û dişmenîya tirkan ya hemberê kurdan helbet rojênde nêvirazîyaya. Nêzdîyê se serrî yo ke o yo propagandayê nê nefretî beno. Labelê demeyê îqtidarê AKP de propagandayê vilakerdişê nefretê verba kurdan zaf bî bêfesal. Goristanî teyaran ra amey bombakerdene, banê partîyan amey veşnayene, dewî amey veşnayene û wêrankerdene, însanê sivîlî, sey  nimûne Roboskî de, amey bombakerdene, karkerê pemî û findiqan û yê bînî amey dirbetinkerdene, kiştene û çadirê înan amey veşnayene, maçan de sloganê hemberê kurdan amey eştene, hêrişê futbolkaykerdoxanê kurdan ame kerdene, bi seyana partî, komel, rojname, radyo, TVyê kurdan amey girotene, Demirtaş û bi hezarana sîyasetmedarî bînî amey zîndankerdene, şaredarê ke kurdan bi reyanê xo ya weçînaybî kurdan dest ra amey girotene û herinda înan de memûrê dewlete amey tayînkerdene. Nê çîyê pêro bi propagandayê demagojîyê ”teror”îya amey kerdene û tirkan mîyan de seba kurdan dişmenîyênda sewîyedê wehşetî de peyda kerde.  Rayedarê hukmatî, serokkomar, serokê tayê partî û komelanê tirkan û medyaya tirkan hewna zî na dişmenîye teşwîq û gurr kenê. Na polîtîka hîmanê dewletênda IŞÎDkanî ronana.  

Cora, zaf xelet o ke kes vajo ”grûbêda faşîste hêrişê cenaza kerdo." Ez şena vaja, nêmeyî ra vêşêrê tirkan ameyê o sînor, yanî bi nefretê kurdan a winî ameyê degirotene ke hertim şenê hêrişê kurdan bikerê.  

Ke tirkan mîyan de nefretê hemberê kurdan no derce de ravey şîyo, erjêndê ma û înan o hempar nêmendo. Cora înan a cuyayîş mumkun nîyo. Netîceya na polîtîka do verê kurdan bajaranê tirkan ra bido Kurdistanî. Belkî kurdî do nika nêşê sînoranê sîyasîyan ronê, labelê kişta kultur, ziwan, cografya û hîsî ya do Tirkîya parçe bo û ma do pê ra bireyê. Wexto ke kay qedîyêno, qeçekê sêwregijî yê sûkijî vanê ”çaxala maxala her kes evine daxala”…