17 û 18ê êlule de Koyê Herekolî ke qezaya Dihê ya Sêrtî de yo de operasyonêk dîyabî destpêkerdiş û netîceyê operasyonî de mabênê leşker û gerîlayan de pêrodayîş qewimîyabî. Dima ra herême ser o bombeyî ameybî varnayîş û netîceyê bombevarnayîşî de 13 gerîlayî şehîd kewtbî.
Dima ra cenazeyê gerîlayan ardbî Nêweşxaneyê Dewlete yê Sêrtî û ewja de otopsîya înan ameybî viraştiş. HPGyî 14ê Teşrîna verêne de nasnameyê gerîlayan aşkere kerdbî û keyeyê gerîlayan seba ke cenazeyanê xo bigîrî muracatê Serdozgerîya Komare ya Sêrtî kerdî. Heta nika hende wext derbaz bî, labelê hema zî keyeyî cenazeyê xo nêgirewtî.
Babete ser o keyeyî dîyar kenî ke dozgerî înan ra vato tena 10 cenazeyî estî. Cok ra keyeyî waştî şêrî cayê operasyonî, labelê bi mehneya ‘operasyon esto’ ameyî astengkerdiş. Goreyê vatişê dewijanê aye herême, keyeyî fikirîyenî ke netîceyê bombevarnayîşî de beno ke laşê tayê gerîlayan parçe bîyo.
10 cenazeyê ke ameybî teşhîskerdiş, nêdîyayî keyeyanê înan û taxanê cîya-cîyayan de ameyî definkerdiş. Nameyê gerîlayê ke şehîd kewtbî, wina yo: Mehmet Sîraç Alp (Şervan Azad - Mêrdîn), Bahoz Cefer (Bahoz Tolhildan - Xurmal), Mesut Oktan (Erdal Munzur - Mûş), Erdal Îşbîlîr (Eşref Kurtay - Wan), Ruken Bîlen (Evrîm Şahîn - Amed), Berfîn Caymak (Jînda Firate - Sêrt), Sedat Akdag (Kurtay Faraşîn - Şirnex), Hevîdar Farise (Roj Gîvera - Dêrik), Hemîn Alîpenah (Sîmko Leylax - Sînê), Vezîr Akçîçek (Şahîn Amed - Amed), Ferhat Koşker (Şervan Nurhak - Swîsre) û Gulcan Arike (Zeynep Asya - Semsûr).
ANF