Vizêr Amed de çarçoweyê 25ê Mijdarî de, verê bana Şaredariyê Sûr de nûmayiş viraziya. Nûmayiş de ceniyê ke komkiştenanê Pîrsûs, Amed û Enqera de kişiyay, yad bî. Lîsa Çalan, a ke teqînê mîtîngê HDP yê Amedî de hurdî lingê xo kerdî vinî zî tewrê nûmayiş bî. Çalan nûmayiş de qisey kerd û vat: Herb-lejan de tewr zaf, zerriya cenî û qijan veşeno, la cenî lejan qedinenî.
Dersîm ra heta Batman nûmayişî
Dersîm de zî, navendê ciwiyayiş ê cenî verva şîddet ê komkiştenan afîş kerdî dard. Kûçeyan de zî ebi Kurdî û Tirkî “ Roja Tekoşîna Verva Şîddetê Ceniyan Ser” stiker zeliqnay dêsan.
Dêrîk de, aktivîstanê KJA semedê tewirbiyayişê şiyayişê 25’ê Mijdarî, vilavokî kerdî vila. Azaya KJA Gulseren Yuzal, veng da ceniyan û waşte ke, cenî aktîf tewrê nûmayişî bibê û vengê xo berz bikerê.
Agirî de Şaredariyê Bazîd û Merkezê ceniyan ê Sema Yuce ra xeylê ceniyan miyer kurdalê û vilok kerdî vila. Ceniyan şar ra waştî ke tewrê çalakiyanê 25 ê Mijdar’î bibê.
Wan Elbak de zî, aktvîstanê KJA û azayanê Meclîsê Ceniyan ê Şaredarî, panel viraşt û sînevîzyon mojna ra. Batmand de, aktivîstanê KJA panel û semînerî viraştî. Qalkerdişan de tekoşînê ceniyan ame zûn û ceniyan ra waziya ke verva piyerê sereştişan, her ca de, pê xopawitişa cewab bidê.
Ewro zî rîwalê 25’ê Mijdarî Kurdistan, Rojhelatê Miyanî û dinya de ebi se hezaran cenî meydanan de vengê xo kenê berz û şîdet rê vanê beso.!