Vervatoxa Meclîsê Cenîye yê HDP û HDKî vatî ke ê wazenî rasteyê ke weçînaye de 8ê Adare pîroz bikê, seba ke cenîyan azadîya xo wazenê yenî qetilkerdiş û ê do qîrayişê cenîyan berz bikê û têkoşînê xo aver bibê.
Pêroyina Dinya de cenîyê do 8ê Adare de biherikê rasteyan û yewbînan silam bikê. Çarçiweya 8ê Adare zî xebatê sazîyê cenîye zî domyenê. Babete ser o Vervatoxa Meclîsê Cenîye yê HDKî Aynur Cengîz û Vervatoxa Meclîsê Cenîye yê HDPî Pinar Turk qise kerdê. Vervatoxa Meclîsê Cenîye yê HDPî Aynur Cengîz vat ke çarçiweya 8ê Adare ganî cenîyê rasteyan de xebatê taybet bikê û wina vat: “Ma nêzdî 2 aşmê ke xebat kenê, taybetî babetê Pêameyişê Stenbolî, Qanûnê 6284î û Heqê Nafakaye ser o broşuran hedre kerdê. Çi heyfo ke cenîyan heqê xo nêzanenê. Armancê ma zanekerdişê cenîyan o.”
Aktîvîteyê nawitişê fîlman
Vervatoxa Meclîsê Cenîye yê HDPî Cengîz aşkera kerd ke bi aktîvîteyê nawitişê fîlman cenîyan reyde yenî têhet û wina domna: “Ma sifte şayîya xo TJAyî reyde Sultangazî de viraşt. Cenî ke nêeşkenî beşdarê 8’ê Adare bibê û xebityenî ra zî planê ma yê taybet estê. Cenîyê taybetî sektorê tekstîlî de xebityenê, no ser ma do broşuranê xo rasteyê sektorê tekstîlî de vila bikê.”
Cenîyan êdî qebul nêkenê
Vervatoxa Meclîsê Cenîye yê HDPî Pinar Turk zî destnîşan kerd ke emserre şîara 8’ê Adare zî ‘Azadî de bi israr, ma têkoşîn de bi qerar ê’ a û wina dewam kerd: “Cenîyê do vera şîdet, taciz, tecawiz û polîtîkayê merdeyî de bivejê kuçeyan. Ewro çalakîyê ke Şîlî de yenî kerdiş, ewta de zî elaqa vînena. Tewro peynî mîsalê ci ‘Las Tesîs’ o. Na çalakî pêroyina Dinya de elaqa dî, êdî cenî qebul nêkenê. Têkoşînê Cenîye êdî rewşêka enternasyonal o.”
Vervatoxa Meclîsê Cenîye yê HDPî Turk pare kerd ke rasteyê ke 8ê Adare pîroz kerdinê nika ameyî qedexekerdiş û wina qedîna: “Ma wazenî rasteyê ke ma weçînaye de 8ê Adare pîroz bikê, ma Stenbol de sifte Kadikoy peynî zî do Taksîm de bibê û peynî zî ma do beşdarê Meşê Şane yê Femînîste ra bibê. Gulîstan Doku çi heyfo ke hema zî vînî ya, seba ke cenîyan azadîya xo wazenê yenî qetilkerdiş. Ma do qîrayişê cenîyan berz bikê.”
JINNEWS/STENBOL