Ceniyanê Kurd, Tirk û yê dinya emserr roja ceniyan bi rihê serhewedayin û îsyanî ravêrnay. Pêrokîn dinya de bi milyonî cenî serva heqanê xo vejyay meydanan, şîdet kişkiş û nêheqiyan rê vatî beso. Herzewbîn waştişê serbestî û ciwyana serbest kerdî. Cenî endî 8’ê Adar de qûwetê xo kenê jû, rêxistina xo kenê gird û pêrokîn maniyê verniya xo ravêrnenê.
8’ê Adar bi bedelê giran, bi xoverdayişê girdî vejya teber. No xoverdayişî pêrokîn ceniyanê dinya rê zanabiyişê hera, cesaret û îradeyê pîl da. Ser no kiltûrê xoverder tekoşînê serbestî yê ceniyan berz bi û pêrokîn ceniyan rê kêberê dinyayê newî akerd. Werziyayişê ceniyan ciwyana ke bêtam û bêboy bî açarna biharî, ciwyan û ceniyê merdî, reyna-onca ganî kerd, rih da ci, raya serbestî akerd…
Îsyan û qîra ceniyan ke verra nêheqî, di-riyî, kedwerdî û înkarî Newyork de destpa kerd nika resena asîmanan. Ceniyê Kurd ke xoverdayişê Newyork xo rê zey mîras girotî nika rojhelatê miyanî de serva-qandê ceniyan kêberê serbestî akerdî. Verra camêrdê serdest û sîstema ci ya hikûmdar xo kerdî adir veşnay, xo kerdî bombe teqînay, bi serrano meterîsan de ganê xo day ver gule, tanq û topanê artêşê camêrdan.
Nika serva serbestiya pêrokîn ceniyanê dinya ceniyê Kurd rayverîn kenê. Ceniyê Kurd bi xoverdayişê xo yê destanî, bi tekoşîn û destkewtişan biyê çimê omidê pêrokîn ceniyan. Ceniyê ke serva serbestî tekoşîn danê xoverdayişê ceniyanê Kurd ra îlham gênê, riyê xo açarnenê hetê Kurdistan.
Emserr pêrokîn ceniyê dinya hona vêşî biyê qûwet, roj bi roj hewna vêşî sînoranê sîstemê koledar werte ra hewadenê. Endî ne dewletî ne zî sînorê înan, nêşenê ceniyan lete bikerê. Ceniyanê Kurd ceniyê Efrîqa, Emerîqa, Asya, Awrûpa û rojhelatêmiyanî ardî pêhet. Çiyo ke ceniyan ano pêhet statuyo ke no sîstemî înan rê ferz kerdiyo. Çi ke kamiyê ci ciya bê zî, cenî her ca de eynî qederî vînenê. Cok ra îsyanê ceniyan beno berz. Endî cenî vanê, ma zî estê û heqanê xo wazeme. Ceniyê ke îsyan kenê, serdestiya camêrdan, cinsîyetperweriya hometî û hikumdariya sîstem red kenê, gam bi gam nezdiyê serbestî benê.
Camêrdê serdest yê ke ceniyan zey xîzmetkarê xo vînenê û kiştişê ceniyan zey heq xo rê vînenê qebûl kenê, nêkenê wa rind bizanê ke endî sîstema înan welişyena. Endî camêrdî dê nêşê çiwext keyfê înan biwazo ceniyan bikişê, tecawizê ci bikerê. Camêrdî qebûl bikerê zî, nêkerê zî raştîyekê esto ke cenî garantiyê demokrasî û stûnê ciwyana azadî yê.
Endî wextê ceniyanê serbest ame. Cenî endî peymana xo ya civakî ronenê. Prensîbê na peymanî zî azadî, demokrasî, heq û weşî yo. Yê ke nê prensîban rê hirmet gênê şenê sîstema ceniyan de biciwyê, yê ke hirmet nêgênê zî dê teberê na sîstemî de bimanê.
Camêrdan bi hikimdariya xo ya hezaran serran dinya ard sînorê kendalî. Merdimey her roj jan dano, gonî rijneno, bi felaket û qetlîaman ra rî bi rî yo. Xelesnayişê –reynayişê camêrdan û yê pêrokîn dinya destê ceniyan de yo. Cenî dê dinya yo ke camêrdan kerd zey cihenem dê açarnê cinet. Dinya yo ke biyo zey zimistan û zemherî do bi destê ceniyan açarniyo bihara rengarengî.
Çi ke ceniyan serva nayî bedelê giranî dey. Ceniyanê Newyork’î xo kerdî kila adir veşnay, Berîtanan xo kemeran ra eşt, Zîlanan xo zerreyê mezgê dişmenan de teqîna, Vîyanan xo kerd kila adir, Arînan xo kerd bombe û dişmenan rê ray nê da. En peynî Îvana Hoffman zî tewrê govenda azadî yê ceniyanê Kurd bî. Endî mavêna ceniyan de sînorî nêmendî. Ceniyanê Alman, Kurd, Asûrî, Tirk, Ereb û yê bînî dest dayê pê û endî ti qûwet nêşeno nê destan pêra abirno.
Çi ke ceniyê ke riyê xo açarnayê serbestî endî jîl danê.