Konseptê herbê qilêrîn yê dewleta Tirk û hikûmeta ci AKP yê dûştê Kurdan bê mavên rameno. Tewr vêşî zî cenîyê sîyasetvan hedefê nê hêrişan de yê. Verfeka KJA Ayla Akat Ata, Hemseroka DBP Sebahat Tûncel, Hemseroka HDP Fîgen Yuksekdag ra pîya xêlê cenîyê parlementer hetê AKP rehîn amey giroten. Aktîvîsta KJA Xecê Şen ke derheqê hêrişan de ANF rê qisey kerd vist vîrî ke zihnîyeta dewleta Tirk serdest a, dewlet camêrd a û cenîyan hedef gêna. Şen persa ‘çima cinî hedef de yê kerd’ û va, ‘çike tarîx ra na het cenîyan her tim xover da. Leyla Qasim ra heta Besêyan yê ke serreyê xo dûştê îxanet wedarnay, teslîm nêbî û xo kemeran ra eştî, cinî bî.’
Cenîyê Kurd dinya rê model ê
Şen hayr ant xoverdayişê xorayirberdişan û vinderdişê Sêvêyan ser û wina va: “Rîwalo ke cenî her qadê weşî de xover danê û wazenê bîyayiş û xoserîya xo înşa bikerê, benê hedef.” Aktîvîsta KJA Xecê Şen vist vîrî ke Rojhelatê Mîyanî de yê ke dûştê zihnîyetê serdest de tekoşîn danê û dinya rê benê model cinîyê Kurd ê.
Şen herzewbîn hayr ant tayînkerdişê qeyûmî yê Şaredarîyanê DBP ser û aşkere kerd ke sebebê hêrîşanê AKP temsîlîyeta têdûşt û sîstema hemserokîya . Şen da zonayen ke zîhniyet û nezdîbîyayişê Erdoganî ya dûştê cenîyan, zîhniyeta harem ê Qesra Osmanîyan a û wina dewam kerd: “Sîstema ke Erdogan wazeno rono, na ya. Cenîyê ke vernîya na sîstemî de manî yê, ceza keno. KJA tenya dezgehekê nîya. KJA pêro cenîyê ke kuçeyan de yê ya.
Ma dê serbikewê
Şen hayr ant dema pêvacoya çarekerdişî ser û va zey KJA ma rind zanê ke faktoro ke bişêro vernîya na pêvacoyî akero Birêz Ocalan o.
Şen tewr peynî de veng da pêro cenîyanê dinya ke wayîrê KJA û raştîyan bivejyê û va, “Ma êşkenê bi no rengî serbikewê.”
ELÎF DOGAN / MELEK YUKSEL / ANF / AMED