Vera ronayişê qampanê penaberan yê dewanê alewî yê Gurgum û Sêwas nêrazîbiyen û xoverdayişê welatijanê alewîyan rameno. Parlamenterê HDP yê Îzmîr Muslum Dogan aşkere kerd ke îxtidara sîyasî bi sîstematîk wazena dewanê alewîyan de qampî rono. Dogan’î vist vîrî ke nê qampî dê açarnîyê zey qerargehê çeteyanê DAIŞ’î.
Xeta paralelê Rojawa
Muslum Dogan’î da zonayen ke qampê ke Gurgum û Sêwas de wazenê ronê ebi polîtîkayanê Rojawa ra paralel ê û wina dewam kerd: “Bi nayî wazenê paralelê herema Rojawa de jû xet ronê. Ganî dewlet nê polîtîkayan ra fek verado. Amûrê newî yê asîmîlasyonî vistî dewre. Asîmîlekerdişê qomî, hardê xo ra dûrvistişê ci, vûrnayişê demokrafya do krîzeke newî akero.”
‘Dûştê penaberan nîyîme
Parlamenter Dogan’î hayr ant qetlîamanê çeteyanê DAIŞ yê Rojawa, Sûrîye û Enqera ser û vînayişê xo bi nê vatenan ard ziwan: “Alewî dûştê penaberan nîyê, heqê înan yê cuwyayişê bi rûmetîn esto. La nê komê selefî dê nê qampan de bi ca bibê. Meseleya esasî çeteyê DAIŞ dê zereyê nê însanan de xo tenzîm bikerê.”
Bazarîya qilêrîn
Muslum Dogan’î vist vîrî ke bi peymanê peyser qebûlkerdişî ya bi Jûbiyena Awrûpa heqê cuwyayiş yê welatijan yeno îxlalkerdiş û wina dewam kerd: “Heqê weşî kenê babedê bazarî. Bazarîya ser heqanê esasî têkilîya kapîtalîzmê modernîte rafîneno ver çiman. Quwetê emperyalîstî şaran, îtiqatan cografyaya xo ra qerfnenê.” Muslum’î ard ziwan ke îradeyo ke îtiqatî, şarî damusnê konseptê înkar û îmha do rojekê biqedîyo. Şarî vera na siyaset xoverdayişeke gird damûsna, bi vinderdişê hometê alewî no xoverdayiş do hona jêde hera bo.
DÎHA/ÎZMÎR