Çeteyan eynî wextî de mehleyanê rojhelatê Parîs’î de bi tifingan hêrişê şarî kerd. Bar û restorananê Place de la République û yew salonê konserî Bataclan de ke miyan de 1500 kesî estibî qetlîam viraşt. Dormeyê stadê futbolî Stade de France de, wextê maçê ekîbanê Almanya û Fransa de kî çend teqayişî qewimîyayî.
Yew bi yew qir kerdî
Terorîstî bi erebeyan şî verê restorananê Place de la République û pê kalaşnîkofan herkesî hedef girotî. Dima kewtî zereyê restoranî. Konserê Bataclanî bi vengê çekan hesîya pê. Xeylê kesan besekerd ke biremê, la ê bînî êsîr girotiyayî. Tayê kesan kî xo dard we. Goreyê vatenanê şahîdan çeteyan zereyê salonî de însanî yew bi yew qir kerdî. Tenya zerreyê salon de 80 kesî ameyî kiştene.
Goreyê zonayişan heta nika 129 kesan weşiya xo kerdî vinî. Zewbîn zî netîceyê hêrişan de 99’ê ci giran bi desan kes zî dirbetin ê.
Kerdoxî Kam ê?
Çeteyanê DAÎŞ xo sey wayîrê na qetlîamî da musnayen û mesûliyetê qetlîam girotî ser xo. Reîs-cûmhûrê Fransa Françoîs Hollande aşkere kerd ke nê hêrişî îlanê herb ê. Goreyê vatenan çeteyan na qetlîam rîwalê herbê Fransa yê doştê DAİŞ viraşt. Goreyê malumatê ke polîsan day, hîrê terorîstan xo bi bombeyan teqna, wexto ke polîs kewt zereyê Bataclanî. Yewo çarin hetê polîsî ra ame kiştene. Hîrêna terorîstan xo dormeyê stadê futbolî de teqna. Yewna kî yew kuçeya rojhelatê Parîsî de. Goreyê îdiayan çend terorîstî kî remayî.
Nê hêrişî seba Fransa yenê çi mane?
Sey netîceyê hêrişî çend tedbîrî hetê dewleya Fransa ra ameyî girotene. Pêro Fransa de halo îstîsnayî ame îlan kerdene, sînorî amey giroten. Sînorê Fransa û yê xeylê welatanê bînî de qontrolê sînorî bî zêde. Destûrê polîsî ke hîna çîp qontrolê şexsî, ban û kargehan bikero, esto. Ewro mektebî, zangehî, muzeyî, kitabxaneyî, hopeyî û xeylê cayanê pêroyî yê bînan cadaye manenê, giroteyê.
PARÎS