Veriya wextekê vejya teber ke Karaman de keyeyanê Weqfa Ensar de 45 qijî raştê îstismarê cinsî ameyê. Vera na biyayişî nerazîbiyenê şarî her ke şinê zêdyenê. La çi heyf ke sermiyanê hikûmeta AKP wayrê Ensar vejya û mexdûr sûcdar damûsna. Wezîra Malbat û Polîtîkayanê Sosyal Sema Ramazanoglû bi vatişê ‘jew reynî ra teba nêbeno’ wayrê tecawuzkaran vejyabî. Tecawizkarê ke nê vatiş û polîtîkayan ra cesaret gênê êrişanê îstismarê cinsî ramenê.Jû xebera îstismara cinsî zî Çewlig ra amê. 

Wendekarê lîse yo 16 serrî M.M ke semedê dejnayişê pîze û rûvî hewadiya nêweşxane, wextê mûayene de vejya teber ke  lajek  raştê îstismarê cinsî ameyo. Sermiyanan zey formalîte cipersayişekê da destcikerdiş û 7 kesî girotiyay bin çiman. La badê wextekî tenya sûcdar G.Ç ame tepiştiş, yê bînî pêrokînî serbest veradiyay. 

M.M da zonayen ke o 3 serrî yo bi tehdît, şantaj û tersnayişî raştê îstismara cinsî ameyo. Herzewbîn lajekê mexdûrî da zonayen ke jew sûcdarî ebi vatişê ‘jew reynî de teba nêbeno’ êrişê ey kerdo. Badê nê zonayişan hayr anciya Wezîra AKP Sema Ramazanoglû ser. Çike Ramazanoglû zî bi nê vatişan tecawizkaran sevekna.


‘Destê xo bedenê mi ra biance’

Biyayişa îstismara cinsî roja yewşem hetê Çewligijan amê protesto kerdiş. Bi seyan kesê ke ver Saat Kulesî de amey pêhet vera hikûmet nêrazîbiyenê xo damusnay. Nûmayişa ke hedhe Kongreyê Îslama Demokratîk DÎK viraziya de xêlê temsîlkarê partiyanê siyasî û yê rêxistinê civaka sivîl tewr bî. Nûmayişkaran pankarta “Yê ke vera nêheqî bêveng manenê, şeytanê bê ziwanî yê” akerdî û dowîzê zey “Qijî bêveng mamenê, ti bêveng memane”, “Ez qij a, destê xo bedenê mi ra biancê” wedarnay. 


Bêvengî raya îstismarê newî akena

Azaya Şûra yê DÎK Halîme Aksoy nûmayiş de qisey kerd û hayr ant roj bi roj zêdyayişê êrişanê îstismarê cinsî ser. Aksoy vist vîrî ke Çewlig de veriya coy zî biyayişê îstismarê cinsî bî, la semedo ke şarî nêrazîbiyen nêdamusnay û sermiyanan zî sûcdaran ceza nêkerd, îstismarê newî qewimyenê. 

Halîme Aksoy da zonayen ke nêcezakerdişê îstismarkaran û bêvengiya şarî cesaret da sûcdaran û aşkere kerd ke semedê seveknayişê haştiyê sosyal ganî hona jêde veng bîro vetiş. Aksoy da zonayen ke, eke bêvengî dewam bikero, beno ke dor bîro qijanê herkesî û va: Ya ma dê bêveng bimanê û çinî bibê, ya zî ma dê vengekê gird vejerê, xo û ameyişê xo seveknê.” Badê damustayin welatijan destci şiyayiş kerd. Polîsan waşt nûmayişî rê bibê manî, la şêligî barîqatî vîrna ra. Welatijê ke sloganê ‘Bêveng mevinde, bi bêvengî dor yena to’, ‘Dest mede bedenê qijî’ heta ver Zîraat Bank ray şî. Welatijî pey coy onca bi sloganan ageyray cayê aşkerekerdişî. 


Sûcdarî nê qijî yenê cezakerdiş’

Hîndekara Zangehê Marmara Psîkolog Ayten Denîz Tepelî derheqê babeda îstismarê cinsî yê qijan de qisey kerd û da zonayen ke wextê îxtidara AKP de îstismarê qijan zêdya. Tepelî da zonayen ke hurendiya tecawuzkaran de qijê mexdûr raştê cezayan yenê. Tepelî vist vîrî, AKP zey her çî îstismarê qijan zî kena meşrû û da zonayen ke zey Pozanti qijî yenê cezakerdiş. 


AKP her çî kena rewa

Ayten Denîz Tepelî ard ziwan ke herbo ke Kurdistan de hetê AKP yeno ramiten de zî tewr jêde qijî mexdûr benê. Tepelî hayr ant qiseyanê ‘jû reynî ra teba nêbeno’ yê sermiyananê AKP ke sûcî meşrû kenê ser. Tepelî va: “Kes çiyo ke kerdî ra ceza nêgîno. Kes rîwalê tacîz, ya zî tecawuz nêameyo tepiştiş. Tewr peynî de zey Pozanti qijî amey cezakerdiş. 


 DÎHA/ÇEWLIG/WAN