Vakûrê Kurdistan de startê 8ê Adar Roja Ceniyanê Kedkar yê Dinya Sîlopî de ame dayen û peycoy xêlê sûkan de nûmayişî destpa kerdî. Çewlig de zî nûmayişê 8ê Adar destpa kerdî. Semedê nûmayişan KJA ceniyanan ra waşt ke bi aktîf tewrê nûmayişan bibê.
Ganî cenî rolê xo biyarê ca
Hemseroka DBP yê Çewlig Zeynep Yûrtsever hayr ant raveyşiyînan ser û ard ziwan ke, wextê hina de ganî cenî bi wezîfeyê gird rolê xo kaybikerê. Yûrtsever va, wext, hetê ceniyanê xoverder de ca girotiş o û hina dewam kerd: “Semedê civakekê demokratîk ganî cenî biresê kamiya xo ya xisusî. Zey her herbî, ewro zî Rojhelata Miyanî ke açarniyaya gola gonîn de bedelê tewr gird cenî danê. Na problem tenya yê Rojhelata Miyanî niya. Nê qetlîam û tecawizî meseleyê pêrokîn dinya yê. Heta ke verniya qetlîam û tecawizî nîro girewten, do vilayê pêrokîn dinya bibo. Yûrtsever ceniyê ke xoverdanê selamî kerd û da zonayen ke, taritîya dinya encex bi roşnîya ceniyan bena roşn.
Vizêr sûk de Navendê Kultur yê Şaredarî de bi tewrbiyena Parlamentera HDP yê Stenbol Huda Kaya panel viraziya. Panel de hayr anciya şîdeta vera ceniyan ser û hewcedariyê berzkerdişê tekoşîn ame ziwan. Herzewbîn ewro zî sûk de rayşiyîn viraziyeno û damustayin yeno dayen. Sûkanê bîn yê Vakûrê Kurdistan de zî nûmayişê 8ê Adar ke bi slogana ‘Cenî serva azadîya Rayverê xo danê xover’ viraziyenê zî ramenê
JINHA/ÇEWLIG