La Çewlîg de her kes yew bêvengî ra behs keno. Kî her bêvengî qerîna, îsyan o. Hele, bêvengîya Çewlîg hewn ra nîyo, hêrs ra yo. Şarê Çewlîg him bi hêrs, him zî bi bawerî merhaleyê yew qeraro newe de yo. Merdim şikeno vajo şarê Çewlîg îsyan de yo. Xo, îstîkbalî xo nirxneno.
Çewlîgij vanî; qaseko yeno vîra ma, na bêvengî wextî weçînî makeqanune ya cuntaya Kenan Evrenî de zî estbî. Vanî bêvengîya ewro manena bêvengîya a roj. Ki yenozanayiş şarê Çewlîg makeqanuna hikumran, a ke hîna ewro merîyetî de ya, makeqanuna tirkperest û redker, o wext serra heştay nêpejirna, tesdîq nêkerd, meşru nêvîna, red kerd.
Çewlîg de qanaato sîyasî vano, şarê Çewlîg eynî sey a roja verên bawerîya xurt dano şarê Tirkîya, teqez zî narey yew dersa hol dano zîhnîyeta totalîter AKP. Şarê Çewlîg, heman hesab de yo. Kurdîya kirdkî tv a nîbi. Kirdkî fernî nîbî.
Kirdkîyo qedîm vînî beno. Hînî eseno şarê Çewlîg narey reye xo dano zonê xo, kultur û kelepûrî xo. Şarê Çewlîg narey reye xo dano vîra xo, vîna xo, ecdadî xo, dano şehîdan xo.
Şarê Çewlîg narey reya xo dano xozayê xo, dano asmano kewe, dano herdo rengîn dano dara mazîyêr. Reye xo dano tarîxî xo. Şarê Çewlîg narey reye xo dano şerefî xo.
No weçînayê de Çewlîg de di partî têver danî. Partîya Demokratîk ya Şaran (HDP) û AKP. Merdim eşkeno bi zerr rehetî û weşhali vajo, sey her caye Vakûrê Kurdistan, sey her herunîya Serhed û Botan Çewlîg de zî her şeherwar û dewij têder konsolîde paradîgmaya newe “merdimahîya gird” û “medenîyeta merdimahî” bîyo.
Hinî eseno şarê Çewlîg narey o vatişo ke mana yewîtî dano “yê ma” ra hes kerd kî partîya xo HDP dero. Hinî eseno şarê Çewlîg narey meylî xo dano vîzyona ‘cuya newe’, henverê meyle tekperest û menfeatperesta AKP meylî xo dano zafbîyayiş û tahayula demokratîkbîyayiş. Şarê Çewlîg qabî înşakerdişî medenîyeta merdimahî reye xo dano xo.
Çewlîg de bê îstîhdamî dewlet her kes bêkar o. Tirkîya de sermîyana ya netew ra en cayo qels, dim Dêrsim en cayo feqir Çewlîg o.
Koç dano, her roj gunî vînî keno. Nêçarî ra texmînên şeşsey hezar çolîgij metropolanî Tirkîya û dîyaspora de cuyeno.
Ayera şarê Çewlîg a partîya ke otorîterî û wesayetdarî red kena, hemê hemwelatîyan seypê esas gena, heqî merdiman û kamîya her kes esas gena, heq edalet esas gena, reye xo dano HDP.
Şarê Çewlîg serra pancas û panc reye xo dano partîya xo HDP. Do di wekîl bido heza demokratîk, bido Meclîsa gird…