Wezîrtiya Karê Zerî nûmayişê bimbarekîn yê Newroz tomet (qedexe) kerd. Nê cayan ra jew zî Çewlig o. Çewlig de vizêr bi seyan welatijî vejyay meydanan û qerarê hikûmeta AKP protesto kerd. Parlamenterê HDP Hîşyar Ozsoy, Îdrîs Balûken û Huda Kaya ra piya bi seyan kesê ke  ver bana DBP yê Çewlig de are bî, bi slogana ‘Kurdistan faşîzm rê beno mezel’ heta raya Dortyol rayşî. No mavên de wesayîta hewayî ya Drone ser şêligî perriya. 


Wa no wesar bibo wesarê bindestan

Badê şiyayiş parlamentera HDP yê Stenbol Huda Kaya qisey kerd û vist vîrî ke Newroz roja newî ya, roja vejîyayişê xoza ya. Kaya ard ziwan ke newe ra vejîyayen nezdî yo û hina dewam kerd: “Verniya zimistanan ser payan de vinderime. Vera taritî û zimistanan çi qe dest bidime yewbînî hendayî wesarî nezdî benê. Wa no wesar bibo wesarê bindestan. 

Peycoy Parlamenter Hişyar Ozsoy xîtabê şarî kerd û da zonayen ke, îyenan bi desan reynî hikûmet îqaz kerdiyo.  Ozsoy’î ard ziwan ke, Tirkiye açarniyayo Sûriye û hina va: “Bi tanq, top, gaz û copî şima nêşkenê şaran bitersnê.  


Tirkiye açarniya keyeyê şênî

Parlamenterê HDP Îdrîs Balûken’î zî hayr ant polîtîkayanê herb yê AKP ser û hina va: “Yê ke wextê demê çarekerdin de ma het de roniştî tûnika xo de ‘planê tesfiye’ girotî. O plan ke nika pêrokîn Tirkiye açarna keyeyê şênî. Amed ra heta Colemerg, Antalya ra heta Edîrne her keye açarniya keyeyê şênî. Na zihnîyet emel kena ke bi zorvajî, bi herb do netîce bigîro. Ewro semedê ke ma na zihnîyet protesto bikerê Çewlig de ameyîme pêser.” 

Balûken’î ard ziwan ke, ganî no zihnîyet bivîno ke, îradeyê şaranê no hardî nîno şikiten, bi zext û zorvajiyan şarî nînê bêvengkerdin. Balûken’î va, semedê adirê azadî  Seyît Riza, Şêx Seîdan ganê xo feda kerd û qiseyê xo hina domna: “Domanê no şarî her roj bedelî danê. Mazlûm Dogan’î bi hîrê kibrîtan, mîrasê adirê Newroz şaran rê verada. Ma zey alwozê Mazlûm Dogan’î Çewlig ra soz danê ke adirê Newroz do nîro defênayen. 


Her cayê Kurdistan cayê Newroz o

Parlamenterê HDP Îdrîs Balûken’î da zonayen ke, rixmê ‘qedexe’ û zextan coşê Newroz do her ca de bîro cuwyayen û hina va: “Enê zextî encex benê wesîle ke, ma çormeyê adirê de, bi kulturê xoverdayiş, bi îrade û qerardariyeke gird bîrê pêhet. Na seat ra tepya hikûmeta AKP ya ke qedexeyan vist dewre ganî bizano ke, her metre kareyê Kurdistan cayê Newroz o, cayê azadî yo. Badê qiseyan şêlig reyna bi sloganan heta ver bana DBP rayşî.  


 DÎHA/ÇEWLIG