Roşnvîr, nuştox  û Mudirê Weşanê Pêroyî yê Rojnameyê Agosî Hrant Dînk 10 serrî verê 19ê çileyê 2007î de amebî qetilkerdiş. Emser sergêra 10. yê qetilkerdişê Hrant Dînkî yo. Hrant Dînk qetilkerdişê xo ra ver zî xeylê reyan amebî tehdîtkerdiş. Wexto ke Dînk ame qetilkerdiş, xeylê delîlî orte de estbî, labelê reyna zî qatilî nêameyî cezakerdiş.

Hrant Dînkî 6ê sibata 2004 de roportajê xo yo ke bi sernuşteyê ‘Sirê Sabîha Xatune’ rojname de weşêna. Dima ra Rojnameyê Hurrîyetî bi îmzeya Ersîn Kalkanî xeberêk bi sernuşteyê ‘Sabîha Gokçene ya yan zî Hatun Sebilcîyane ye’ weşêna û sey çimeyî zî Rojnameyê Agosî nîşan da. Na xebere ser o zaf munaqeşeyî vejîyayî. Na xebere ver Sererkanîya Pêroyî îzehetêk da û xebere seba yewîya neteweyî û erjê pêroyî sey tehluke şinase kerd. Na xebere ra 3 rojî dima Dînkî muracatê Serdozgerîya Komare ya Şîşlî kerd. Walîtîya Stenbolî 24ê sibata 2004 de vengê Dînkî daye û îfadeyê ci girewte. Goreyê îdîayan Hetkarê Walî Ergun Gungorî û 2 kesê bînî Dînkî tehdît kerdî. Nêyî ra dima bi nameyê Mehmet Soykanî de kesêk muracatê dozgerî kerd û bi îdîaya ke ‘Dînkî heqaretê nîjadê tirkî kerdo’ madeya 301 ra doze akerd.

Madeya 159 ra doze abîye

26ê sibata 2004 de grûbeka nîjadpereste ameye berê Agosî ver û Dînkî tehdît kerde. Her ke şî tehdîtê vera Dînkî de zêde bîyî. Xeylê kesê bînî derheqê ermenî û Dînkî de gerre kerdî û doze akerdî. Çiqas gerreyî ameyî kerdiş, dozgerî zî derheqê Dînkî de hende dozî akerd. Buroya Çapemenî ya Serdozgerîya Komara Şîşlî qerar da ke Dînk goreyê madeya 159î ya TCKyî ‘heqeretê nîjada tirkî kerdiş’ ra bêro mehkemekerdiş.

Musteşarî îmze kerd

Badê ke dozgerî waşt ke doze bêro akerdiş, herinda Wezîrê Edaletî yê o wextî Cemîl Çîçekî de Musteşarê ci Fahrî Kasirgayî qerarî îmze kerd. Yeno zanayîş ke nameyê Kasirgayî Doza Ergenekonî de têkilîya ci Velî Kuçukî reyde vejîyabî. Herinda Çîçekî bi fermanê musteşarî 30ê adara 2004 de doze ameye akerdiş. Abîyayîşê doze ra dima heme wextê Dînkî mehkemeyan de derbaz bîyênê. Dima ra doze şîye heta 9. Daîreya Ceza ya Mehkemeya Berze ya. Heyetê mehkeme 15ê gulana 2005 de raporêk amade kerd û goreyê raporî sucdarîya ke derheqê Dînkî de estbî, bêbinge vejîyaye.

8ê temuza 2005 de roniştişê yewin yê doze de Mehmet Soykan û 9 kesê bînî mudaxîlê doze bîyî. Roniştiş de dozger Muhîttîn Ayatayî dîyar kerd ke o raporî qebul nêkeno û ganî Dînk xebere ver madeya 159. ya TCKyî ra bêro cezakerdiş. 7ê teşrîna verêne 2005 de ceza dîya Dînkî û ceza ameye taloqkerdiş. Dima ra doze ameye xirakerdiş labelê dozgerî îtîrazê qerarî kerd û doze kirişt Heyetê Pêroyî yê Ceza. Heyetî 11ê temuze de Dînkî sucdar dî û no qerar zî vernîya kişîyayîşê Dînkî akerd.


‘Ma heme hetê  Erdoganî ra ameyî tayînkerdiş’

Doza 31. yê qetilkerdişê Mudirê Weşanê Pêroyî yê Rojnameyê Agosî Hrant Dînkî Mehkemeya Cezaya Girane ya 14. ya ke Çaglayan de ame vînayîş. 

Roniştişê doze bi wendişê belgeyan dest pêkerd. Dima ra roniştişê doze bi îfadedayîşê Mudirê Şûbeya Cyî yê Daîreya Îstîxbaratî Alî Fuat Yilmazerî dewam kerd.Yilmazero ke doza qetilkerdişê Hrant Dînkî de pawitiş da, wina va: “Nika tayînan ma kerdî îdarekarê rêxistina terorî. Ma heme hetê serekwezîrê o wextî Tayyîp Erdoganî ra ameyî tayînkerdiş. Çira yew selahîyetdaro sîyasî daxî tîya de çin o. Yê ke seba tehqîqetanê Ergenekon û Balyozî emir dayo, Erdogan bi xo yo.” 


YASÎN KOBULAN / DÎHABER / STENBOL