Dûştê darbeya AKP, MHP û CHP ya vera HDP nêrazîbiyenî ramenê. Temsîlkaranê sazgehanê alewî yê Îzmîr kî vera wedarnayişê heqê destnêdayişî yê HDP nêrazîbiyen damûsnay. Temsîlkaranê alewî vistî vîr ke jû darbeyekê bîn nay demokrasîya welatî ro.
No zilm do kêberê CHP zî pirodo
Serokê keyeyê cem yê Narlidere Mûstafa Aslan’î hayr ant polîtîkayê CHP ser û aşkere kerd ke CHP bi paştdayişê AKP do hesab bido. Aslan’î ard ser ziwan ke no zilm do rojekê kêberê CHP zî pirodo û wina va: “CHP cayo ke dûştê herbê qilêrîn de vindero eksê ci kerd. Gune pêrokîn çormeyê ke hetkarê demokrasî û azadîyê HDP het de ca bigîrê. Dûştê kayanê îxtidar yê vera kurdan û alewîyan tekoşîn ra tepya şansê ma yê bîn çinyo. Ganî welatijê ke wayrê wîjdanî yê pêro pîya vera kaosî tekoşîn bikerê.”
CHP darbe vist demokrasî
Îdarekarê Komeleya Demokratîk yê Alewîyan yê Îzmîr Huseyîn Ozan’î zî vist vîrî ke wedarnayişê heqê destnêdayişî êrişekê dûştê pîyacuwyayişê şaran a. Ozan’î da zonayen ke bi HDP ra pîya kamîyê cîya meclîsî de temsîlê xo dî û vist vîrî ke HDP serva şaran roştîya omedî ya. Ozan’î vat ke hikûmetê AKP qet kêfweşîya şaran nêwazena û no ser zî AKP nika Tirkîya kerda gola gonî.Ozan wina dewam kerd: “Çi heyf ke CHP, qanûnê darbe ra vat ‘e’, ma zey şarê elewîyî fikrîya ke do CHP no qanûnê darbe nê bivajo. No hêriş, verba komelî ame kerdiş, nêzdîbîyayîşê CHPe, nêzdîbîyayîşêko welatperwer nîyo. CHP demokrasî ra darbeyêka gird da piro, verê dîktatorîya AKPe zî akerd. CHP do demo kilm de nê polîtîkayê xo ra zirar bivîna, ma zî zanenî hetgirê CHPe zî nê kerdişê CHPe ra nêrehet î, no ser zî ganî elewîyî, CHPe reyde têkilîya xo verçiman ra bivîyarnî.”
CHP muxalîfî nêkerd
Seroka Komeleya Pîr Sultan Abdalî Elîf Bakir zî destnîşan kerd ke çi heyf ke Tirkîya de elewîyî ke estî CHPe ra omidê xo girêdayî la CHPe şî verê dîktatorîya AKPe akerd û no dergî da qiseyê xo: “Çew verba belêkerdişê qanûnê darbe ya CHPe ra wa şaş nêmano. Dîrokî ra nika CHP qet nêzdîbîyayîşêko bi îstîkrar nîşan nêdayo û nêeşkena muxalîfî bikera. Hawanayîşê nêdestnêdayîşê HDPijan 6 mîlyon îrade ra darbeyêka girde ya. Nika ra pey şar Meclîsî ra bawer nêkeno. Demokrasî ra tewr gird darbe AKP nê CHP da piro. AKP û CHP seba çinkerdişê HDPe yew bîyî.”
DÎHA/ÎZMÎR
Ma rê her ca cayê xoverdayişî yo
Partîyanê rejîmî AKP, CHP û MHP heqê destnêdayişê HDPyijan wedarna. CHPyijan demê wedarnayişê destnêdayîşî de rîwalê ke AKP het de ca girewtî, CHP rê nêrazîbiyenî damûsnay.
Serokê Weqfê Demokratîke û verê wekîlê CHP Ercan Karakaş’î destnîşan kerd ke no qanûn dijberî Makeqanûn û huqiqî yo, xora Makeqanûn babeta destnêdayîş de kêm bî, ganî no qanûn biameynî rojdemkerdiş la hawanayîşê destnêdayîşî hadreyaya weçînayîşê lezî yo.
Omidê haştî têk şi
Karakaş qiseyê xo wina dewam kerd: “No qanûn zey ke seba heme wekîlan vetî nîşan danî la esil hedef HDPe yo, no ser zî ganî CHP no qanûn bero verê Dadgeha Makeqanûnî. Eke Dadgeha Makeqanûn no qanûn belê nêkero, no qanûn nîno qebulkerdiş.”Verê wekîla CHP Bînnaz Toprak zî dîyar kerd ke çi heyf ke bi hawanayîşê destnêdayîşê wekîlê HDP omidê aştî têk şi, a omid kena ke daraz no kaos bivîno goreyê ci zî heqê wekîlê HDPe qerarê girewtişê nêdo û wina vat: “Ganî CHP, no qanûn bikirişa Dadgeha Makeqanûnî.”
Ders nêgirewtî
Verê wezîrê xebat û komelî Zîya Halîs zî ciresna ke Tirkîya de polîtîka xetimyaya, hawanayîşê destnêdayîşî do şer hîna xorîn bikero û şar zî do yewbînan ra cîya bibo û serra 1994’î de zî eynî ravêreyeya ame cuyayîş la na ravêreye ra çew ders nêveto. Halîs veng da CHPe ke wa pîya no qanûnî bikirişî Dadgeha Makeqanûnî û Tirkîya na bixelisnî.”
DÎHA/STENBOL