Kitabê Selahattîn Demîrtaşî weşanxaneyê Dîpnotî ra 16ê êlule de vejîya. Nameyê kitabî Seher a. Tedeyîya kitabî de diwês hebî hîkayeyî estî. Hûmara kitabî zî se û çewres çahar pel a. Weşanxaneyê Dîpnotî mîyanê kitabî de di hebî ayran zî dano wendoxanê xo. Weşanayîşê kîtabî ra heta ewro kîtab mîyanê şarî de xeylek eleqe dî; çapa pancine zî çend rojî verê vejîya û humara kitabî resa hewtay henzar. Demîrtaş nêzdîyê yew serre yo ke hepisxane de yo û zaf çî reyde eleqeder beno. Demîrtaş hevêrî çend hebî resîmî viraştî û weşanayî. Badê resîmanê xo zî kitabê xo qedêna û da weşanîyayişî. Demîrtaşî kîtabê xo bi ziwanê tirkî nuşto.
Mîyanê kitabî de diwês hebî hîkayeyî estî. Hîkayeya yewine de odaya hepisxaneyê xo ra û cîrananê xo ra behs kerdo. Cîranê êy murcela û mirçik î. Ciwîyayişê xo yê hepîsxane û cîranan ra behs keno û pê mirçikanê camerdî û xoverrodayîşî tasvîr keno. Hîkayeya dîyine de yew kênaya delale ra behs keno. Na hîkaye xora nameyê kitabî zî girewto. Ciwîyayîş, heskerdiş û merdişê Sehere bi teferuatan nusîyayî. Dramê Sehere zî ziwanê akerde ra îzah kerdo.
Hîkayeya hîrêyine zî tekoşînê ciwîyayîşê yew kênaya feqîre ser o nusîyaya. Xeyalanê kênaya feqîre ra behs keno û meseleya girane ke serê kênaye ra vîyarena û cuya kena senî bedîlîyena û senî xeletî ra bena yew têkoşer, hemê nê babetan bi ziwanêko zelal îzehet kerdo. Hîkayeya çaharine de persayene û eşqê yew merdimê xortî bi dejanê ey tasvîr kerdo. Hîkayeya pancine de di merdiman ra behs keno. Nê di merdimî înşaatê Hepisxaneyê Edîrne de xebîtîyenî, tasvîrê hîsanê xebatkaranê înşaatî û eşqê Huseyîn û Berfîne ser o vindeno.
Hîkayeya şeşine de yew mektube nusîyaya. Hepisxaneyan de semedê wendişê mektuban yew komîsyon esto. Mektubê ke hepsîyan ra yenî yan zî mektubê ke hepsîyî teberî rê nusenî nê komîsyonî nê mektuban wanenî û badê cû zî înan tesdîq kenî. Na hîkaye de Demîrtaş bi yarenîye karê komîsyon û xebatkaranê komîsyonî ra behs keno û înan rexne keno. Hîkayeya hewtine de şexsê Mîna de rewşa multecîyan ra behs keno. Hîkayeya heştine de şerê ke Sûrîye de rameno û qetlîamê ke benî ser o nusîyaya. Rewşa Sûrîye zî yew merdimo ereb ser o nusîyaya û bi dejî qedîyena.
Hîkayeya newine de Demîrtaşî meseleyê wexto wendekarîya xo ser o nuşto. Rahar Anqere, şofêrê otobuse û xapinayiyişê xo û wexto ke beno avûkate zî dewamê meseleya yewbînîdîyayişê şofêrî ser o nuşto. Hîkayeya desine de yew vîrameyîşê xo nuşto. Vîrameyîş, meseleyo verên o û mîyanê mesele de behsê dadîya û birayê xo keno. Hîkayeya yewindesine de babeta xorine esta. Ciwîyayîşê yew cinî, eleqeya cinî û babîya aya û persayîşê cinî ser o nuşto. Na hîkaye zafîyer xeletîyê ciwîyayişê merdiman îzeh kena û bi meseleyan zî semedê xelîsîyayîşê xeletîyan ser o aqil dano. Hîkayeya diwêsine de zî bi şexsê Mehmet Tuncî de dejanê kurdan, omidê holbîyayîşê kurdan û demo ameyoxa kurdan nusîyayo.
Xusûsîyetê vatiş û ziwanê hîkayeyan; sade û balkêş a. Ridê sadeyîya ziwanî, merdim eşkeno yew geringe de bi kefî heme kitabî biqedîno. Her hîkaye de zî fikrê xorînî û meseleyê dejê şaran estî. Peynîya her hîkaye de zî yew zanayîş, musayîş, mesajê insanetîye û cesareto gird dano. No kîtab gereka hetê her kesî ra bêro wendiş. Xerlî bo. Wa destê Demîrtaşî weş bî.