Cênîyan verênî ra hata gundê nika, duştê zalimêna dewletan de cuamerdan ra jêde emeg do. Çike înan jû hetê îsonîye ra nêonto, hete ra kî cênî bîyê deyin, heqeret û milqiyê bêanoran ra kî onto. Serva herb cênîyan çiqaşê zerar dîyo hona kes qesey nêkeno. Cênîyê kirmancan xoverdayîşê Kobanê de jêdena verê çim de bî, hama ê deva-deve hîris û panc serrê yo ke xoverdayîş der ê.
Cênîyî ewro her kes ra jêde haştîye wazenê, hama nê qanûnê ke virajînê ne ê, ne kî polîtîkawa tomete (qedexe) na omid nêdana. Omid nîya bimano dewlete hete ra cancerê DAIŞan rê poşt vejîna. Jê pêro cênîyan cênîyê kirmancan zanene ke DAIŞ raver cênîyan rê dismenên keno.
Herb, rozvejê miyanênî de Rojawan û Şengal vêsneno. Gundê bêtêkewtîşê tayê mezalan vetî wertê, gereke cedelê cênîkan de nê bivênîyê. Azbirnayîşê (jênosîdê) hermenîyan, azbirnayîşê 37-38ê Dêrsimî, hêrişê 6-7 êlule û azbirnayîşê Şengalî de decê ke cênîkan vênitê, ê kî bîyarê vîr, hen bikerîme ke vîra meşêrê. Lesa cênikan ser mordeman û dewlatan çiqaşê heqeretî ke kerdê eskera bibê. Na sebeban ra wo ke DAIŞ çimê cênîyan de jû kayê kolonyalîstan nîyo. Aqlê DAIŞ, mordeme ke wazenê cêni çê ra mevejîyê, kuçeyan de mefetelîyê, meydanan ra bioncîyê aqlê înû ra kî qewete cênê.
Dewletî ebe herb ra jû (yew) sucê îsonîyê nêkenê, hetê ra cênîkan rê kî suc pêda kenê. Cênîkan tecavuz vênenê, xo darde kenê, bindestîya mordeman rê maruz manenê. Hona hazar ra jêde cêni destê DAIŞî de hêsir ê. Na semed ra cedelê cênîyan jû verro vecîyayîşê DAIŞî nîyo, hem kî ver vecîyayîşê mordemê kolonyalîstan o. Na semed ra gereke cedelê cênîkanê Rojawan rê wayîr bîvejîme. Çike cedelê cênîyan, cenemeyê rozvejê mîyanenî ra vecîyayîşo.
Herbê Sûrîya cênîkan rê çi ardo her çî eskera wo. Cênîkan, vêsayîyê herb ra her çî royê xo de weyî kenê. Cênî cawo ke remê uca kî hêrişê azperestan û mîlîtarîstan rê maruz manenê. Rozvejê mîyanênî de çi ceneme ke esto, hîris serra wo ke na welat de kî cenemeyê cênîkan dewam keno. Gereke cênîyî êndî bêveng memanê. Êndî cênîyî kî haştîyê ser polîtîka de, cayê xo bijêrê. Guman çîn o ke no, poşt jûbîndayîşê cênîkan ra yêno meyda. Haştîye ronayene de raştîya cênîyan û waştîşê cênîyan hata ke ca dî o dem kirmancîye, Tirkîya û îsonîye kî xeleşîna. Çike herb de zeraro pîl her dem cênîyan dîyo, qaydeyanê haştîye kî gereke ê bivirazê.
Ewro Kobanê de zafer ke ame, gereke her kes bizano ke no raver xêra Arîn Mirkan o, xêra Jin Xerbîsan, Baharîn Çîya, Derya Botan, Rûheyv Cûdî, Raperîn Tolhildan, Sozdar Reco, Amara Dêrsim, Mîzgîn Mahîr, Neval Şeran, Nûda Cindires… yo. Çike înan Kobanê de hem anorê îsonîye hem kî anorê cênîyanê dîna qorî kerd. Çerxê dîna ke dewam kerd, mêrxasena na cênîyan kî gereke dewam bikero.
DAÎMÎ DOGAN