Cênîyan verênî ra hata gundê nika, duştê zalimêna dewletan de cuamêrdan ra jêde emeg do. Çike înan teyna hetê însanîye ra nêonto, hete ra kî cênî bîyê deyin, heqeret û milqiyê bêanoran ra kî onto. Serva herb cênîyan çiqaşê zerar dîyo hona kes besenêkeno qesey bikero. Cênîyê kirmancan xoverdayîşê Kobanê-Rojava de jêdena verê çimî de bî, hama ê deva-deve hîris û panc serrê yo ke xoverdayîş der ê.
Cênîkî ewro her kes ra jêde haştîye wazenê, hama nê qanunê ke virajînê ne ê, ne kî(zî) polîtîkawa qedexeyan omid nêdana. Omid nîya bimano dewletan hete ra cancerê IŞÎDan rê poşt vejînê. Jê(sey) pêro cênîyan, cênîyê kirmancan zanene ke IŞÎD raver cênîyan rê dismenên keno.
Herb, Rojakewteno(rojhelato) miyanênî de raver Rojava û Şêngal vêsnayî. Gundê bêtêkewtîşê tayê mezalan vetî wertê, gereke(ganî) cedelê(mucadeleyê) cênîkan de nê bivênîyê. Jênosîdê(azbirnayîşê) hermenîyan, 37-38ê Dêrsimî, hêrişê 6-7 êlule û Şêngalî de decê ke cênîkan vênitê, ê kî bîyarê vîr, hen bikerîme ke vîra meşêrê. Lesa cênîkan ser mordeman û dewlatan çiqaşê heqeretî ke kerdê eskera bibê. Na sebeban ra wo ke IŞÎD çimê cênîyan de ju(yew) kayê kolonyalîstan nîyo. Aqlê IŞÎDî, mordeme ke wazenê cênîyî çê(key) ra mevejîyê, kuçeyan de mefetelîyê, meydanan ra bioncîyê aqlê înan ra kî qewete cênê.
Dewletî ebe herb ra ju sucê însanîye nêkenê, hetê ra cênîkan rê kî suc pêda kenê. Cênîkan pê kaykerdiş(tecavuz) vênenê, xo darde kenê, bindestîya mordeman rê maruz manenê. Hazar ra jêde cênî destê IŞÎDî de hêsir mendîbî. Na sevet(semed) ra cedelê cênîyan teyna verro vecîyayîşê IŞÎDî nîyo, hem kî ver vecîyayîşê mordemê kolonyalîstan o. Na sevet ra gereke cedelê cênîkanê Rojava rê her kes wayîr bîvejîyo. Çike cedelê cênîyan, cenemeyê rojakewteno mîyanenî ra vecîyayîşo.
Herbê Surîya cênîkan rê çi ardo her(heme) çî eskera wo. Cênîkan, vêsayîyê herb ra her çî royê xo de weyî kenê. Cênîkî cawo ke remê uca kî hêrişê azperestan û mîlîtarîstan rê maruz manenê. Rojakewtenê mîyanênî de çi ceneme ke esto, hîris serra wo ke na welat de kî cenemeyê cênîkan dewam keno. Gereke cênîyî endî(êdî) bêveng memanê. Endî cênîyî kî haştîyê ser polîtîqa de, cayê xo bijêrê. Guman(şik) çîn o ke no, poşt jubîndayîşê cênîkan ra yeno meyda. Haştîye ronayene de, raştîya cênîyan û waştişê cênîyan hata ke ca dî o dem Kirmancîye, Tirkîya û însanîye kî xeleşina. Çike herb de zeraro pîl her dem cênîyan dîyo, qaydeyanê haştîye kî gereke ê bivirazê.
Ewro Rojava de zafer ke yeno, gereke her kes bizano ke no raver xêra(xeyr) Arîn Mirkan a, xêra Jin Xerbîsan, Baharîn Çîya, Derya Botan, Rûheyv Cûdî, Raperîn Tolhildan, Sozdar Reco, Amara Dersim, Mîzgîn Mahîr, Neval Şeran, Nûda Cindires…ya. Çike înan Kobanê-Rojava de hem anorê însanîye hem kî anorê cênîyanê dîna qorî kerd. Hondê(qasê) ke dîna çerxê xo rê dewam kerd, qoynayîşê mêrxasena nê cênîyan kî gereke dewam bikero.