Bi pêşnîyazê qanûnî ke yeno plankerdiş ke pêşkêşê Meclîsî bibo de hewl dîyeno ke selahîyetê birnayîşê mareyî bidî muftîyan. Labelê heta nika vera nê planî de xeylê reaksîyonî ameyî nîşandayîş. Babete ser o Parlamentera HDPyî ya Stenbolî Fîlîz Kerestecîogluye qisey kerde.
Kerestecîogluye bale ante vatişê Wezîrîya Polîtîkayanê Sosyal û Keyeyî ke vatbî ‘Na rojevêka sunî ya’ ser û wina va: “Şima bi xo na rojeve vejenî û dima ra şima vanî ‘çîyêko bêro munaqeşekerdiş çin o’. Nê, çîyêko bêro munaqeşekerdiş esto.
Wazenî bikerî qanûnî
Kerestecîogluye dewamê qiseykerdişê xo de wina va: “Wazenî kerdişê ke derheqê cinî û domanan de yî, bi hawayêko bîn bikerî qanûnî. Verê waştî bi komîsyonê cîyabîyayîşî nêyî bikerî, dima ra waştî bi qanûnê îstîsmarê cînselî nêyî bikerî. Waştî tecawizê kesanê sey Huseyîn Uzmezî meşrû bikerî û kurtajî qedexe bikerî. Eke denetîm nêbo, do cayanê şenikan de çi biqewimîyo, ma nêzanî. Ez bawer kena ke cinîyî do dinya bibedilnî.”
ŞÛJIN/STENBOL