Şer û polîtîkayanê dewletan ver tewr zaf cinî û domanî mexdur benî. Seba weşîya cinîyê penaberî û domanan Weqfa Merkezê Cinîyan (KAMER) 23 Şûbeyanê xo de dest bi xebatan kerda. Înan ra yew zî şûbeya Semsûrî ya. Babete ser o Temsîlkara Şûbeya Semsûrî ya KAMERî Serpîl Ateş Korkmaze, xebatkaran ra Nîlufer Demîre (43), Fatma Kîngîre (36) û Guler Çîlîogluye qisey kerdî.
Qezençkerdişê ekonomî
Demîra ke wayîrê 4 domanan a, qiseykerdişê xo de wina va: “Ma tîya de cinîtîya xo ferq kerd. Kesê ke yenî, tentene û karê destan vîrazenî. Verê cû ma tena ewnîyayêne domanan û serê sibayî ra heta şewe ma pakî kerdêne. Ma tîya de ekonomî û azadîya xo qezenç kerd.”Maya 4 domanan Kîngîre zî serrêk ver beşdarê xebatan bîya û qiseykerdişê xo wina domnaye: “Badê beşdarbîyayîşê xebatan, ez xo hîna baş îfade kena. Ez seba xo û ameyoxa domananê xo xebetîyena.” Çîlîogluya ke (46) 3 aşmî ver beşdarê xebatan bîya û wina va: “2 domanê mi estî. Xebatê 3 aşman hetê madî û manewî de her tewir hetkarîye dayî mi. Ameyîşê mi yê tîya ra dima cuya mi bedilîyaye.”Korkmaze zî wina va: “Şarê penaberî hetê kultur û ziwanî de zehmetîyan ancenî. Ma hetê dîyîşê kar, musayîşê ziwan, şinasnayîşê kultur û sewbîna hetan de hetkarî danî penaberan. Ma seba eştişê psîkolojîya şer hetkarîya psîkolojîk û psîkososyalî zî danî penaberan. Ma kursê ziwan, merkezê şitişê kincan û weşîye akerd. Doktor, hemşîre û personelê weşî xizmet danê doman û cinîyanê penaberan.”
DÎHABER / SEMSÛR